ദുബായ്: ദുബായിൽ നിന്ന് ഇസ്രായേലിലെ ടെൽ അവീവിലേക്ക് പറന്ന ഫ്ലൈദുബായ് വിമാനം തട്ടിയെടുത്ത് ബെൻ ഗുരിയോൻ വിമാനത്താവളത്തിലേക്ക് ഇടിച്ചിറക്കാൻ ഒമാൻ സ്വദേശിയായ കോ-പൈലറ്റ് നടത്തിയ വൻ ഭീകരാക്രമണ ശ്രമം തകർത്തു. വിമാനത്തിലുണ്ടായിരുന്ന കമാൻഡിംഗ് ഓഫീസറായ ഇന്ത്യൻ പൈലറ്റ് ക്യാപ്റ്റൻ സ്‌മിത് മച്ചാറിന്റെ ധീരവും സമയോചിതവുമായ ഇടപെടലാണ് 170-ലധികം വരുന്ന യാത്രക്കാരുടെയും ജീവനക്കാരുടെയും ജീവൻ രക്ഷിച്ചത്.
സെപ്റ്റംബർ 30-ന് ദുബായിൽ നിന്ന് പുറപ്പെട്ട FZ1073 ഫ്ലൈദുബായ് വിമാനത്തിൽ അരങ്ങേറിയ ഞെട്ടിപ്പിക്കുന്ന വിവരങ്ങൾ അന്വേഷണത്തിനൊടുവിൽ യു.എ.ഇ അറ്റോർണി ജനറൽ ഹമദ് സെയ്‌ഫ് അൽ ഷംസിയാണ് ഔദ്യോഗികമായി പുറത്തുവിട്ടത്.
കോക്പിറ്റിൽ ചോരക്കളി; പ്രതിരോധം തീർത്ത് ഇന്ത്യൻ പൈലറ്റ്
യു.എസ് വേൾഡ് ട്രേഡ് സെന്ററിൽ നടന്ന സെപ്റ്റംബർ 11 ആക്രമണത്തിൽ നിന്ന് പ്രചോദനം ഉൾക്കൊണ്ടാണ് കോ-പൈലറ്റായ 29-കാരൻ ഹമാം അൽ-ഹമ്മമി ഈ ആക്രമണം ആസൂത്രണം ചെയ്തതെന്ന് അന്വേഷണസംഘം സ്ഥിരീകരിച്ചു. ആകാശമധ്യേ വെച്ച് വിമാനത്തിലെ എമർജൻസി കോടാലി ഉപയോഗിച്ച് ഇയാൾ ക്യാപ്റ്റൻ സ്‌മിത് മച്ചാറിനെ ക്രൂരമായി ആക്രമിക്കുകയായിരുന്നു. വിമാനത്തിന്റെ പൂർണ്ണ നിയന്ത്രണം പിടിച്ചെടുത്ത് ടെൽ അവീവ് വിമാനത്താവളത്തിലെ ടെർമിനലിലേക്ക് ഇടിച്ചിറക്കാനായിരുന്നു ഇയാളുടെ നീക്കം.
തലയ്ക്കും ശരീരത്തിനും ഗുരുതരമായി പരുക്കേറ്റെങ്കിലും കോക്പിറ്റിന്റെ നിയന്ത്രണം വിട്ടുകൊടുക്കാതെ ക്യാപ്റ്റൻ മച്ചാർ ധീരമായി ചെറുത്തുനിന്നു. വൻ ആഘാതത്തിൽ വിമാനം താഴേക്ക് പതിക്കുന്നതിനിടെ, കോക്പിറ്റ് വാതിൽ തുറന്ന് യാത്രക്കാരെ വിവരം അറിയിക്കാൻ അദ്ദേഹത്തിന് സാധിച്ചു. തുടർന്ന് യാത്രക്കാരും വിമാനത്തിലുണ്ടായിരുന്ന മറ്റ് ക്രൂ അംഗങ്ങളും കോക്പിറ്റിലേക്ക് ഇരച്ചെത്തി അക്രമിയെ കീഴ്പ്പെടുത്തുകയായിരുന്നു.
പ്ലാൻ ചെയ്തത് വൻ ദുരന്തം
വൻതോതിൽ ആളപായം വരുത്തുക എന്ന വ്യക്തമായ ഉദ്ദേശ്യത്തോടെയാണ് പ്രതി ഈ കൃത്യം നടപ്പാക്കാൻ തുനിഞ്ഞതെന്ന് യു.എ.ഇ പബ്ലിക് പ്രോസിക്യൂഷൻ വ്യക്തമാക്കി. ആക്രമണത്തിന് മുന്നോടിയായി വിമാനത്താവളത്തിന്റെ റൺവേ ലേഔട്ടും റൂട്ടും കൃത്യമായി പഠിക്കുന്നതിനായി ഇയാൾ മുൻപ് രണ്ടുതവണ ഇതേ വിമാനത്തിൽ യാത്ര ചെയ്തിരുന്നതായും അന്വേഷണത്തിൽ കണ്ടെത്തിയിട്ടുണ്ട്.
ഗുരുതരമായ അടിയന്തര സാഹചര്യങ്ങൾക്കൊടുവിൽ വിമാനം സൗദി അറേബ്യയിലെ തബൂക്കിൽ സുരക്ഷിതമായി അടിയന്തര ലാൻഡിംഗ് നടത്തി. പരുക്കേറ്റ ക്യാപ്റ്റൻ സ്‌മിത് മച്ചാറിന് വിദഗ്ധ ചികിത്സ ലഭ്യമാക്കിയിട്ടുണ്ട്. സ്വന്തം ജീവൻ പണയം വെച്ചും നൂറുകണക്കിന് ആളുകളെ രക്ഷിച്ച ഇന്ത്യൻ പൈലറ്റിന്റെ അസാധാരണ ധീരതയ്ക്ക് അന്താരാഷ്ട്ര തലത്തിൽ വലിയ പ്രശംസയാണ് ലഭിക്കുന്നത്.
Leave a Reply