മുംബൈ: ബോളിവുഡ് താരം ടൈഗർ ഷ്റോഫിന് നേരെ വെടിയുതിർത്ത കേസിലെ പ്രതികൾ മണിക്കൂറുകൾക്കകം പിടിയിലായി. വെടിവയ്പ്പിനു ശേഷം ട്രെയിൻ മാർഗം രക്ഷപ്പെടാൻ ശ്രമിച്ച മൂന്നംഗ സംഘത്തെ രാജസ്ഥാനിലെ കോട്ടയിൽ നിന്നാണ് പോലീസ് കസ്റ്റഡിയിലെടുത്തത്. പ്രതികൾക്ക് കുപ്രസിദ്ധ ഗുണ്ടാതലവൻ ലോറൻസ് ബിഷ്ണോയിയുടെ സംഘവുമായി ബന്ധമുണ്ടെന്നാണ് പ്രാഥമിക വിവരം.
ബീഹാർ സ്വദേശി ഹൃതിക് കുമാർ, ഹരിയാന സ്വദേശി രേഹൻ, ഒപ്പമുണ്ടായിരുന്ന പതിനേഴുകാരൻ എന്നിവരാണ് രാജസ്ഥാൻ ആന്റി ഗ്യാങ്സ്റ്റർ ടാസ്ക് ഫോഴ്സിന്റെ പിടിയിലായത്.
കഴിഞ്ഞദിവസം വൈകിട്ട് ഏഴ് മണിയോടെ ഫുട്ബോൾ കളി കഴിഞ്ഞ് മടങ്ങുകയായിരുന്ന ടൈഗർ ഷ്റോഫിന്റെ വാഹനത്തിന് നേരെയാണ് ആക്രമണമുണ്ടായത്. ആക്രമണത്തിൽ നടൻ തലനാരിഴയ്ക്ക് രക്ഷപ്പെട്ടെങ്കിലും ഒപ്പമുണ്ടായിരുന്ന ഡ്രൈവർ ഫിർദോസിനും സമീപത്തുണ്ടായിരുന്ന ഓട്ടോറിക്ഷാ ഡ്രൈവർക്കും പരിക്കേറ്റു. ഇരുവരെയും ഉടൻ തന്നെ ആശുപത്രിയിൽ പ്രവേശിപ്പിച്ചു.
ആക്രമണത്തിന്റെ ഉത്തരവാദിത്തം ലോറൻസ് ബിഷ്ണോയ് സംഘം ഏറ്റെടുത്തതായാണ് റിപ്പോർട്ട്. സൽമാൻ ഖാനുമായി സൗഹൃദം പുലർത്തുന്നവർക്കെതിരെ നടപടിയുണ്ടാകുമെന്ന ഭീഷണിയും സംഘം മുഴക്കിയിരുന്നു. എന്നാൽ തനിക്ക് നേരത്തെ വധഭീഷണികളൊന്നും ഉണ്ടായിരുന്നില്ലെന്നും സൽമാൻ ഖാനുമായി അടുത്ത ബന്ധമില്ലെന്നും ടൈഗർ ഷ്റോഫ് വ്യക്തമാക്കി.
സംഭവത്തിന് പിന്നാലെ അന്ധേരി റെയിൽവേ സ്റ്റേഷനിൽ ബൈക്ക് ഉപേക്ഷിച്ച് ബോറിവലിയിലെത്തിയ പ്രതികൾ, അവിടെ നിന്ന് പൂനെ – ജയ്പൂർ എക്സ്പ്രസ് ട്രെയിനിൽ കടന്നുകളയാൻ ശ്രമിക്കുകയായിരുന്നു. മുംബൈ പോലീസ് നൽകിയ വിവരങ്ങളുടെ അടിസ്ഥാനത്തിൽ നടത്തിയ തെരച്ചിലിലാണ് രാജസ്ഥാനിലെ കോട്ട റെയിൽവേ സ്റ്റേഷനിൽ വെച്ച് ഇവരെ വളഞ്ഞുപിടിച്ചത്. പ്രതികളെ ഉടൻ തന്നെ മുംബൈ ക്രൈംബ്രാഞ്ചിന് കൈമാറും.
സംഭവത്തിൽ ക്രിമിനൽ സംഘങ്ങൾക്കെതിരെ കർശന നടപടിയുണ്ടാകുമെന്ന് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് വ്യക്തമാക്കി. അക്രമികൾക്കെതിരെ ശക്തമായ നിയമനടപടികൾ സ്വീകരിക്കുമെന്നും അദ്ദേഹം കൂട്ടിച്ചേർത്തു. അക്രമ സംഭവങ്ങളുടെ പശ്ചാത്തലത്തിൽ മുംബൈയിൽ ബോളിവുഡ് താരങ്ങളുടെ സുരക്ഷ സംസ്ഥാന സർക്കാർ വർധിപ്പിച്ചിട്ടുണ്ട്.
Leave a Reply