റാണിപുരം അഡ്വഞ്ചർ പാർക്ക് തുറന്നത് സുരക്ഷ ഉറപ്പാക്കി; പ്രചാരണങ്ങൾ അടിസ്ഥാനരഹിതമെന്ന് മാനേജ്‌മെന്റ്

കാഞ്ഞങ്ങാട്: റാണിപുരത്ത് പ്രവർത്തിക്കുന്ന അഡ്വഞ്ചർ പാർക്കിന്റെ പ്രവർത്തനം പുനരാരംഭിച്ചത് എല്ലാവിധ സുരക്ഷാ മാനദണ്ഡങ്ങളും മുൻകരുതലുകളും കർശനമായി പാലിച്ചുകൊണ്ടാണെന്ന് പാർക്ക് മാനേജ്‌മെന്റ് അറിയിച്ചു. സന്ദർശകരുടെയും ജീവനക്കാരുടെയും സുരക്ഷ ഉറപ്പാക്കാൻ വിട്ടുവീഴ്ചയില്ലാത്ത ക്രമീകരണങ്ങളാണ് പാർക്കിൽ ഏർപ്പെടുത്തിയിട്ടുള്ളത്. ഇതിനെതിരെ നടക്കുന്ന വ്യാജവും അടിസ്ഥാനരഹിതവുമായ പ്രചരണങ്ങളിൽ പൊതുജനങ്ങൾ വിശ്വസിക്കരുതെന്നും മാനേജ്‌മെന്റ് വാർത്താക്കുറിപ്പിൽ അഭ്യർത്ഥിച്ചു.

അപകടങ്ങൾ മേലിൽ ഒരിടത്തും ആവർത്തിക്കാതിരിക്കാൻ സാങ്കേതിക വിദഗ്ദ്ധരുടെ നേരിട്ടുള്ള മേൽനോട്ടത്തിൽ പാർക്കിലെ മുഴുവൻ റൈഡുകളിലും സമ്പൂർണ്ണ സുരക്ഷാ ഓഡിറ്റിംഗ് (Safety Auditing) പൂർത്തിയാക്കിയ ശേഷമാണ് പാർക്ക് സന്ദർശകർക്കായി തുറന്നുകൊടുത്തത്.

പ്രധാന മാറ്റങ്ങളും പുതിയ ക്രമീകരണങ്ങളും:

സിപ്‌ലൈനിൽ പ്രത്യേക സുരക്ഷാ വാതിലുകൾ: മുൻപ് സിപ്‌ലൈൻ ആരംഭിക്കുന്ന ഭാഗം തുറന്ന നിലയിലായിരുന്നുവെങ്കിൽ, ഇപ്പോൾ അപകട സാധ്യതകൾ പൂർണ്ണമായി ഇല്ലാതാക്കാൻ പ്രത്യേക സേഫ്റ്റി ഡോറുകൾ (Safety Doors) സ്ഥാപിച്ചു. റൈഡ് ആരംഭിക്കുന്ന കൃത്യസമയത്ത് മാത്രം തുറക്കുകയും റൈഡർ പോയ ഉടൻ തനിയെ അടയുകയും ചെയ്യുന്ന സംവിധാനമാണിത്. ഇതിലൂടെ റൈഡർമാർക്കോ ജീവനക്കാർക്കോ അബദ്ധത്തിൽ കാൽവഴുതി വീഴാനുള്ള സാഹചര്യം പൂർണ്ണമായും ഒഴിവാക്കി.
ജീവനക്കാർക്ക് സേഫ്റ്റി ഹാർനസ്: റൈഡുകൾ പ്രവർത്തിപ്പിക്കുന്ന മുഴുവൻ ജീവനക്കാർക്കും കർശനമായ സേഫ്റ്റി ബെൽറ്റ് (Safety Harness) സംവിധാനം നിർബന്ധമാക്കിയിട്ടുണ്ട്.
റോപ്പ് റൈഡിൽ അധിക സംരക്ഷണം: റോപ്പ് റൈഡർ പ്രവർത്തിക്കുന്ന ഭാഗത്ത് കൂടുതൽ സുരക്ഷാ ഗേറ്റുകളും അധിക ഹാൻഡ്‌റെയിലുകളും സ്ഥാപിച്ച് സുരക്ഷിതത്വം ഉറപ്പാക്കി.
പരിശീലനം സിദ്ധിച്ച ജീവനക്കാർ: ഗ്ലാസ് ബ്രിഡ്ജ് ഉൾപ്പെടെയുള്ള മറ്റ് ആക്ടിവിറ്റികളിലും സമഗ്ര പരിശോധന പൂർത്തിയാക്കി. നിലവിൽ മികച്ച പ്രവൃത്തിപരിചയവും പരിശീലനവുമുള്ള ജീവനക്കാരെ മാത്രമാണ് റൈഡുകൾ നിയന്ത്രിക്കാൻ ചുമതലപ്പെടുത്തിയിട്ടുള്ളത്.

കേന്ദ്ര-സംസ്ഥാന സർക്കാരുകളുടെ വ്യവസായ നയങ്ങൾക്ക് വിധേയമായും, ജില്ലാ വ്യവസായ കേന്ദ്രത്തിന്റെ മാനദണ്ഡങ്ങൾ പാലിച്ചും നിയമാനുസൃതമായ എല്ലാ അനുമതികളോടെയുമാണ് പദ്ധതി പ്രവർത്തിക്കുന്നത്. തദ്ദേശ സ്വയംഭരണ സ്ഥാപനമായ പനത്തടി ഗ്രാമപഞ്ചായത്തിന്റെ എല്ലാ നിർദ്ദേശങ്ങളെയും പാർക്ക് അധികൃതർ സ്വാഗതം ചെയ്യുന്നു. പഞ്ചായത്ത് ആവശ്യപ്പെടുന്ന എല്ലാവിധ സാങ്കേതിക പരിശോധനകളോടും പൂർണ്ണമായി സഹകരിക്കുമെന്നും, ആവശ്യമായ എല്ലാ സുരക്ഷാ രേഖകളും സർട്ടിഫിക്കറ്റുകളും ബന്ധപ്പെട്ട അധികാരികൾക്ക് മുമ്പാകെ സമർപ്പിച്ചിട്ടുണ്ടെന്നും മാനേജ്‌മെന്റ് വ്യക്തമാക്കി.

കാസർകോട് ജില്ലയുടെ ടൂറിസം സാധ്യതകൾ പ്രയോജനപ്പെടുത്തുന്നതിനും സഞ്ചാരികൾക്ക് സുരക്ഷിതമായ വിനോദാനുഭവം സമ്മാനിക്കുന്നതിനും പ്രതിജ്ഞാബദ്ധമായി പ്രവർത്തിക്കുന്ന ഈ സംരംഭത്തിനെതിരെയുള്ള ദുഷ്പ്രചാരണങ്ങളിൽ നിന്ന് ബന്ധപ്പെട്ടവർ പിന്തിരിയണമെന്നും, യാഥാർത്ഥ്യങ്ങൾ മനസ്സിലാക്കി പൊതുജനങ്ങളും സന്ദർശകരും പാർക്കിന്റെ പ്രവർത്തനങ്ങളുമായി സഹകരിക്കണമെന്നും മാനേജ്‌മെന്റ് വാർത്താക്കുറിപ്പിലൂടെ അഭ്യർത്ഥിച്ചു.