കാസർകോട്: മാണിമൂല പുളിഞ്ചാലിന് സമീപം കുടിവെള്ള പൈപ്പുകളുമായി വന്ന ലോറി നിയന്ത്രണം വിട്ട് 100 അടി താഴ്ചയിലേക്ക് മറിഞ്ഞു. വെള്ളിയാഴ്ച രാത്രി പത്ത് മണിയോടെയാണ് നാടിനെ നടുക്കിയ അപകടം ഉണ്ടായത്. അപകടത്തിൽ തകർന്ന ലോറിയുടെ ക്യാബിനിൽ കുടുങ്ങിയ ഡ്രൈവറെ അരമണിക്കൂറോളം നീണ്ട സാഹസിക രക്ഷാപ്രവർത്തനത്തിനൊടുവിൽ ഫയർഫോഴ്സും പോലീസും നാട്ടുകാരും ചേർന്ന് രക്ഷപ്പെടുത്തി.
കർണാടകയിൽ നിന്നും കുറ്റിക്കോൽ പഞ്ചായത്തിലെ കുടിവെള്ള പദ്ധതിക്കായി പൈപ്പുകളുമായി എത്തിയ ലോറിയാണ് അപകടത്തിൽപ്പെട്ടത്. നിയന്ത്രണം നഷ്ടപ്പെട്ട ലോറി റോഡരികിലെ കൊക്കയിലേക്ക് തലകീഴായി മറിയുകയായിരുന്നു. ഇടിയുടെ ആഘാതത്തിൽ വാഹനം പൂർണ്ണമായും തകരുകയും ഡ്രൈവർ മുൻഭാഗത്തെ ക്യാബിനുള്ളിൽ കുടുങ്ങിപ്പോവുകയും ചെയ്തു.
വിവരമറിഞ്ഞ് ഉടൻതന്നെ ഫയർഫോഴ്സും പോലീസും പ്രദേശവാസികളും ചേർന്ന് രക്ഷാപ്രവർത്തനം ആരംഭിച്ചു. ക്യാബിൻ വെട്ടിപ്പൊളിച്ചാണ് ഗുരുതരമായി പരിക്കേറ്റ ഡ്രൈവറെ പുറത്തെടുത്തത്. ഇയാളെ ഉടൻതന്നെ വിദഗ്ധ ചികിത്സയ്ക്കായി കാഞ്ഞങ്ങാട്ടെ ആശുപത്രിയിലേക്ക് മാറ്റി.
നിരവധി അപകടങ്ങൾ നടക്കുന്ന ഈ പ്രദേശത്ത് റോഡിന്റെ അശാസ്ത്രീയമായ നിർമ്മാണമാണ് അപകടങ്ങൾക്ക് പ്രധാന കാരണമെന്ന് നാട്ടുകാർ ആരോപിക്കുന്നു. സുരക്ഷാ മുൻകരുതലുകളോ മതിയായ ബാരിക്കേഡുകളോ ഇല്ലാത്തത് രാത്രികാലങ്ങളിൽ യാത്രക്കാർക്ക് വലിയ ഭീഷണിയാകുന്നതായും അധികൃതർ അടിയന്തര നടപടി സ്വീകരിക്കണമെന്നും പ്രദേശവാസികൾ ആവശ്യപ്പെട്ടു.
Leave a Reply