തിരുവനന്തപുരം: സംസ്ഥാനത്തെ ദേശീയപാതകളിലെ റോഡപകടങ്ങൾ കുറയ്ക്കുന്നതിനായി കർശന പരിശോധനകളുമായി മോട്ടോർ വാഹന വകുപ്പ് (MVD). കാസർഗോഡ് തലപ്പാടി മുതൽ തിരുവനന്തപുരം കാരോട് വരെയുള്ള 645 കിലോമീറ്റർ ദേശീയപാതയിൽ എൻഫോഴ്സ്മെന്റ് സ്ക്വാഡിന്റെ 24 മണിക്കൂർ നിരീക്ഷണവും ഹൈവേ പട്രോളിംഗും ആരംഭിച്ചു.
യാത്രക്കാരുടെ സുരക്ഷ ഉറപ്പാക്കുന്നതിനായി മുഴുവൻ ദൂരത്തെയും 6 പ്രത്യേക സോണുകളായി തിരിച്ചാണ് എൻഫോഴ്സ്മെന്റ് വിങ്ങിന്റെ നേതൃത്വത്തിൽ പരിശോധന ഏകോപിപ്പിച്ചിരിക്കുന്നത്. രാത്രിയെന്നോ പകലെന്നോ വ്യത്യാസമില്ലാതെ ആഴ്ചയിൽ ഏഴ് ദിവസവും 24 മണിക്കൂറും ഹൈവേ പട്രോളിംഗ് ടീം നിരത്തുകളിൽ സജീവമായിരിക്കും.
പ്രധാന ലക്ഷ്യങ്ങൾ:
- നിയമലംഘനങ്ങൾ തടയുക: അമിതവേഗത, അപകടകരമായ ഡ്രൈവിംഗ്, അശ്രദ്ധമായ ഓവർടേക്കിംഗ് എന്നിവ തടയുക.
- അടിയന്തര രക്ഷാപ്രവർത്തനം: അപകടങ്ങൾ സംഭവിച്ചാൽ ഉടനടി സ്ഥലത്തെത്തി രക്ഷാപ്രവർത്തനങ്ങൾ ഏകോപിപ്പിക്കുക.
- തടസ്സങ്ങൾ ഒഴിവാക്കുക: യന്ത്രത്തകരാർ മൂലം റോഡിൽ കിടക്കുന്ന വാഹനങ്ങളും അപകടത്തിൽപ്പെട്ട വാഹനങ്ങളും ഉടൻതന്നെ പാതയോരത്തുനിന്ന് നീക്കം ചെയ്ത് ഗതാഗതം സുഗമമാക്കുക.
ഈ പരിശോധനകൾ യാത്രക്കാരെ ബുദ്ധിമുട്ടിക്കാനല്ലെന്നും എല്ലാവരും സുരക്ഷിതരായി വീടുകളിൽ എത്തുന്നുവെന്ന് ഉറപ്പാക്കാനാണെന്നും മോട്ടോർ വാഹന വകുപ്പ് വ്യക്തമാക്കി. മുഴുവൻ ഡ്രൈവർമാരും ഗതാഗത നിയമങ്ങൾ പാലിച്ച് സുരക്ഷിതമായി യാത്ര ചെയ്യണമെന്ന് അധികൃതർ അഭ്യർത്ഥിച്ചു.
Leave a Reply