കണ്ണൂർ: സർക്കാർ നൽകിയ ഔദ്യോഗിക വാഹനത്തിന് പകരം സ്വകാര്യ ആഡംബര കാർ ഉപയോഗിച്ചത് രാഷ്ട്രീയ വിവാദമായതോടെ റേഞ്ച് റോവർ കാർ തിരികെ നൽകി മന്ത്രി കെ.എം. ഷാജി. പ്രവാസി വ്യവസായിയും കെ.എം.സി.സി നേതാവുമായ യഅ്ഖൂബ് തില്ലങ്കേരിയുടെ ഉടമസ്ഥതയിലുള്ളതാണ് കോടികൾ വിലമതിക്കുന്ന ഈ ആഡംബര വാഹനം. കണ്ണൂർ തില്ലങ്കേരിയിലുള്ള യഅ്ഖൂബിന്റെ വീട്ടിലാണ് കാർ തിരികെയെത്തിച്ചത്.
ഔദ്യോഗിക ആവശ്യങ്ങൾക്കായി സർക്കാർ അനുവദിച്ച ഇന്നോവ ക്രിസ്റ്റ കാർ ഒഴിവാക്കി സ്വകാര്യ വ്യക്തിയുടെ പേരിലുള്ള ആഡംബര വാഹനം ഉപയോഗിച്ചതാണ് വിവാദങ്ങൾക്ക് വഴിവെച്ചത്. മന്ത്രിയുടെ ഔദ്യോഗിക ബോർഡും ‘കേരള സ്റ്റേറ്റ് 13’ എന്ന സ്റ്റേറ്റ് നമ്പറും സ്വകാര്യ വാഹനത്തിൽ പതിച്ചാണ് യാത്ര നടത്തിയിരുന്നത്. പൊതുഭരണ വകുപ്പിന്റെ കൃത്യമായ അനുമതിയില്ലാതെയാണ് ഇതെന്ന ആക്ഷേപം ശക്തമായതോടെ ഇടതുപക്ഷം സംഭവത്തിൽ കടുത്ത പ്രതിഷേധവുമായി രംഗത്തെത്തി.
‘സത്യപ്രതിജ്ഞാ ലംഘനം, ദുരൂഹതയുണ്ട്’: ഡിവൈഎഫ്ഐ
മന്ത്രിയുടെ നടപടി ഭരണഘടനാപരമായ സത്യപ്രതിജ്ഞാ ലംഘനമാണെന്ന് ഡിവൈഎഫ്ഐ ആരോപിച്ചു. ഔദ്യോഗിക ലോഗ് ബുക്കോ രേഖകളോ ഇല്ലാതെ ആഡംബര വാഹനം ഉപയോഗിച്ചത് ദുരൂഹമാണെന്ന് ഡിവൈഎഫ്ഐ സംസ്ഥാന പ്രസിഡന്റ് ചിന്ത ജെറോം പറഞ്ഞു. സർക്കാർ വാഹനം അറബിക്കടലിൽ എറിഞ്ഞ മട്ടിലാണ് മന്ത്രിയുടെ പെരുമാറ്റമെന്നും, എന്തെങ്കിലും വഴിവിട്ട സഹായം ചെയ്തതിന്റെ ഭാഗമായുള്ള പ്രതിഫലമാണോ ഈ വാഹനമെന്ന് അന്വേഷിക്കണമെന്നും അവർ ആവശ്യപ്പെട്ടു.
‘സർക്കാരിന് ബാധ്യതയില്ല; വാഹനം ഉപയോഗിച്ചത് സുഹൃദ്ബന്ധത്തിൽ’: മന്ത്രിയും ഉടമയും
അതേസമയം, ഉയർന്ന ആരോപണങ്ങളെല്ലാം മന്ത്രി കെ.എം. ഷാജി തള്ളി. സർക്കാരിൽ നിന്ന് ലഭിച്ച ഔദ്യോഗിക ഇന്നോവ ക്രിസ്റ്റ വാഹനം നാല് ലക്ഷത്തോളം കിലോമീറ്റർ ഓടിയതാണെന്നും ദീർഘദൂര യാത്രകൾക്ക് അനുയോജ്യമല്ലാത്തതിനാലാണ് സുഹൃത്തിന്റെ വാഹനം ഉപയോഗിച്ചതെന്നുമാണ് മന്ത്രിയുടെ വിശദീകരണം. പതിമൂന്നാം നമ്പർ ബോർഡ് ഉപയോഗിച്ചത് സർക്കാരിന്റെ അനുമതിയോടെയാണെന്നും, ഇന്ധനത്തിനോ വാടകയിനത്തിലോ സർക്കാരിൽ നിന്ന് ഒരു രൂപ പോലും കൈപ്പറ്റിയിട്ടില്ലെന്നും അദ്ദേഹം വ്യക്തമാക്കി.
മന്ത്രിയുമായി ദീർഘകാലത്തെ ആത്മബന്ധവും സഹോദര തുല്യമായ സൗഹൃദവുമാണുള്ളതെന്നും താൻ ഷാജിയുടെ ബിനാമിയല്ലെന്നും വാഹന ഉടമ യഅ്ഖൂബ് തില്ലങ്കേരിയും പ്രതികരിച്ചു. ജനപ്രതിനിധി ആകുന്നതിന് മുൻപും ഷാജി തന്റെ വാഹനം ഉപയോഗിച്ചിരുന്നതായും ഇതിൽ യാതൊരുവിധ പ്രതിഫലമോ വഴിവിട്ട ഇടപാടുകളോ ഇല്ലെന്നും അദ്ദേഹം കൂട്ടിച്ചേർത്തു.
Leave a Reply