കൊച്ചി: ഫോര്‍ട്ട് കൊച്ചിയുടെ സമ്പന്നമായ ജൂത പൈതൃകത്തിന്റെ പ്രതീകമായ കോഡര്‍ ഹൗസ് ഹെറിറ്റേജ് ഹോട്ടലില്‍ വന്‍ തീപിടിത്തം. ചൊവ്വാഴ്ച വൈകിട്ട് ഏഴേകാലോടെയുണ്ടായ തീപിടിത്തത്തില്‍ ഇരുനൂറിലേറെ വര്‍ഷം പഴക്കമുള്ള ചരിത്ര കെട്ടിടം പൂര്‍ണ്ണമായും കത്തിനശിച്ചു. അപകടസമയത്ത് ആളപായമൊന്നും റിപ്പോര്‍ട്ട് ചെയ്തിട്ടില്ല.
ഹോട്ടലിന്റെ മുകളിലത്തെ നിലയില്‍ നിന്നാണ് ആദ്യം തീയും പുകയും ഉയര്‍ന്നത്. ശക്തമായ കാറ്റും തടികൊണ്ടുള്ള നിര്‍മ്മിതിയും കാരണം നിമിഷങ്ങള്‍ക്കകം തീ താഴത്തെ നിലകളിലേക്കും ആളിപ്പടരുകയായിരുന്നു. വിവരമറിഞ്ഞ് മട്ടാഞ്ചേരിയില്‍ നിന്നും മറ്റ് സമീപ സ്റ്റേഷനുകളില്‍ നിന്നും ഫയര്‍ഫോഴ്‌സ് സംഘമെത്തിയാണ് മണിക്കൂറുകള്‍ നീണ്ട പരിശ്രമത്തിനൊടുവില്‍ തീ നിയന്ത്രണവിധേയമാക്കിയത്. ഷോര്‍ട്ട് സര്‍‍ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. സംഭവത്തില്‍ അധികൃതര്‍ വിശദമായ അന്വേഷണം ആരംഭിച്ചിട്ടുണ്ട്.
1808-ല്‍ പ്രമുഖ ജൂത വ്യവസായി സാമുവല്‍ എസ്. കോഡറാണ് പോര്‍ച്ചുഗീസ് വാസ്തുവിദ്യാ ശൈലിയിലുള്ള ഈ പ്രൗഢഗംഭീരമായ കെട്ടിടം പണികഴിപ്പിച്ചത്. ദീര്‍ഘകാലം കോഡര്‍ കുടുംബത്തിന്റെ വസതിയായിരുന്ന ഈ സൗധം പിന്നീട് പൈതൃക ഹോട്ടലാക്കി മാറ്റുകയായിരുന്നു. ഫോര്‍ട്ട് കൊച്ചിയിലും മട്ടാഞ്ചേരിയിലും ആദ്യമായി വൈദ്യുതി എത്തിച്ച ‘കൊച്ചിന്‍ ഇലക്ട്രിക് കമ്പനി’ക്ക് തുടക്കമിട്ട ചരിത്രപുരുഷനാണ് സാമുവല്‍ കോഡര്‍. കൊച്ചിയുടെ കൊളോണിയല്‍-ജൂത ചരിത്രത്തിന്റെ പ്രധാന സ്മാരകങ്ങളിലൊന്നാണ് ഈ അപകടത്തിലൂടെ നഷ്ടമായത്.
Leave a Reply