ന്യൂഡൽഹി: കേരളത്തിന്റെ പുതിയ ഗവർണറായി മുതിർന്ന ബിജെപി നേതാവും നിലവിലെ സിക്കിം ഗവർണറുമായ ഓം പ്രകാശ് മാഥൂറിനെ നിയമിച്ചു. കേരള ഗവർണറുടെ ചുമതല വഹിച്ചിരുന്ന രാജേന്ദ്ര അർലേക്കർക്ക് തമിഴ്‌നാട് ഗവർണറുടെ സ്ഥിരം ചുമതല നൽകി. ഓം പ്രകാശ് മാഥൂറിന് പകരം ദുഷ്യന്ത് ഗൗതമാണ് സിക്കിമിന്റെ പുതിയ ഗവർണർ. രാഷ്ട്രപതി ഭവനാണ് പുതിയ ഗവർണർ നിയമനങ്ങൾ സംബന്ധിച്ച ഉത്തരവിറക്കിയത്.
മറ്റ് സംസ്ഥാനങ്ങളിലും ഗവർണർമാരുടെ പുനഃസംഘടന നടന്നിട്ടുണ്ട്:
- ഒഡീഷ: ബ്രജ് മോഹൻ റാം
- കർണാടക: ഡോ. സുധ യാദവ്
- ഉത്തരാഖണ്ഡ്: ഡോ. ധൽ സിങ് ബിസൻ
ആർഎസ്എസ് പ്രചാരകനിൽ നിന്ന് രാജ്ഭവനിലേക്ക്
ആർഎസ്എസ് പ്രചാരകനായി പൊതുപ്രവർത്തനം ആരംഭിച്ച ഓം പ്രകാശ് മാഥൂർ രാജസ്ഥാനിൽ നിന്നുള്ള ബിജെപിയുടെ ശക്തനായ നേതാവാണ്. രാജസ്ഥാനിലെ ബാലി സ്വദേശിയായ അദ്ദേഹം 2008-ൽ ബിജെപി സംസ്ഥാന അധ്യക്ഷനായി പ്രവർത്തിച്ചു. തുടർന്ന് ദേശീയ നേതൃത്വത്തിലേക്ക് ഉയർന്ന മാഥൂർ, ബിജെപി ദേശീയ ജനറൽ സെക്രട്ടറിയായും പ്രവർത്തിച്ചിട്ടുണ്ട്.
1989 മുതൽ 2024 വരെ ബിജെപിയുടെ ദേശീയ എക്സിക്യൂട്ടീവ് അംഗമായിരുന്ന അദ്ദേഹം ഗുജറാത്ത്, കർണാടക, മഹാരാഷ്ട്ര, ഉത്തർപ്രദേശ്, ജാർഖണ്ഡ്, ഛത്തീസ്ഗഡ്, ഉത്തരാഖണ്ഡ് എന്നീ സംസ്ഥാനങ്ങളിലെ നിർണായക തെരഞ്ഞെടുപ്പ് ചുമതലകൾ വിജയകരമായി നിർവഹിച്ചു. 2008, 2016 വർഷങ്ങളിൽ രാജസ്ഥാനിൽ നിന്ന് രാജ്യസഭാംഗമായി. 2024-ലാണ് അദ്ദേഹത്തെ സിക്കിം ഗവർണറായി ആദ്യമായി നിയമിക്കുന്നത്.
വിവാദങ്ങളും രാഷ്ട്രീയ പശ്ചാത്തലവും
രാജസ്ഥാൻ ബിജെപിയിലെ ആഭ്യന്തര വിഷയങ്ങളിലും വിഭാഗീയ ചർച്ചകളിലും ഓം പ്രകാശ് മാഥൂറിന്റെ പേര് പലപ്പോഴും ഉയർന്നു കേട്ടിട്ടുണ്ട്. താൻ ഒരു സ്ഥാനാർഥിയുടെ പേര് തീരുമാനിച്ചാൽ പ്രധാനമന്ത്രി നരേന്ദ്ര മോദിക്കുപോലും അത് മാറ്റാനാകില്ലെന്ന തരത്തിൽ മുൻപ് അദ്ദേഹം നടത്തിയ പ്രസ്താവന വലിയ രാഷ്ട്രീയ വിവാദങ്ങൾക്ക് വഴിവെച്ചിരുന്നു. സ്വന്തം പാർട്ടിയിൽ നിന്നുതന്നെ വിമർശനങ്ങൾ ഉയർന്നതോടെ, തന്റെ വാക്കുകൾ തെറ്റായി വ്യാഖ്യാനിക്കപ്പെട്ടതാണെന്നും പ്രധാനമന്ത്രിയെ അപമാനിക്കാൻ ഉദ്ദേശിച്ചിട്ടില്ലെന്നും വ്യക്തമാക്കി അദ്ദേഹം രംഗത്തെത്തിയിരുന്നു.
Leave a Reply