തിരുവനന്തപുരം: കൊച്ചി ചേരാനെല്ലൂരിൽ ഉണ്ടായ വാഹനാപകടക്കേസ് അന്വേഷണത്തിൽ ഗുരുതര വീഴ്ച വരുത്തിയ നാല് പൊലീസ് ഉദ്യോഗസ്ഥരെ സർവീസിൽ നിന്ന് സസ്‌പെൻഡ് ചെയ്തു. സിഐ ശ്യാംകുമാർ കെ.എസ് ഉൾപ്പെടെയുള്ള ഉദ്യോഗസ്ഥർക്കെതിരെയാണ് നടപടി. ആഭ്യന്തരമന്ത്രി രമേശ് ചെന്നിത്തല നിയമസഭയിലാണ് സസ്‌പെൻഷൻ വിവരം ഔദ്യോഗികമായി അറിയിച്ചത്.
സിഐ ശ്യാംകുമാർ കെ.എസ്, എസ്എച്ച്ഒ വിശ്വജിത്ത് വി.എസ്, എഎസ്ഐ മനോജ് കെ.ടി, സിപിഒ അരുൺ ജോഷി എന്നിവരെയാണ് അന്വേഷണവിധേയമായി സസ്‌പെൻഡ് ചെയ്തത്.
സംഭവസ്ഥലം നേരിട്ട് സന്ദർശിച്ച് എഡിജിപി പി. വിജയൻ സമർപ്പിച്ച അന്വേഷണ റിപ്പോർട്ടിന്റെ അടിസ്ഥാനത്തിലാണ് സർക്കാരിന്റെ ഈ അടിയന്തര നടപടി. അപകടത്തിൽപ്പെട്ട വാഹനവും കേസ് ഡയറിയും പരിശോധിച്ച എഡിജിപി, പ്രാഥമിക ഘട്ടത്തിൽ തന്നെ പൊലീസിന്റെ ഭാഗത്തുനിന്ന് ഗുരുതരമായ വീഴ്ചകൾ സംഭവിച്ചതായി കണ്ടെത്തിയിരുന്നു. കൃത്യമായ വകുപ്പുകൾ ചുമത്തുന്നതിലും പ്രതിയെ കസ്റ്റഡിയിലെടുക്കുന്നതിലും ഉദ്യോഗസ്ഥർ അനാസ്ഥ കാട്ടിയെന്ന കണ്ടെത്തലിനെ തുടർന്നാണ് ആഭ്യന്തര വകുപ്പിന്റെ ശക്തമായ ഇടപെടൽ. കേസിൽ ആർക്കും ഇളവ് നൽകില്ലെന്നും കർശന നടപടി തുടരുമെന്നും സർക്കാർ വ്യക്തമാക്കി.
Leave a Reply