തിരുവനന്തപുരം: കൊച്ചി ചേരാനല്ലൂർ കണ്ടെയ്‌നർ റോഡിൽ സ്കൂട്ടർ യാത്രികനായ ജയബാലകൃഷ്ണൻ കാറിടിച്ചു മരിച്ച സംഭവത്തിൽ കർശന നടപടികളുമായി ആഭ്യന്തര വകുപ്പ്. കേസിൽ വീഴ്ച വരുത്തിയ പൊലീസ് ഉദ്യോഗസ്ഥർക്കെതിരെ കർശന നടപടിയെടുക്കാൻ ആഭ്യന്തരമന്ത്രി രമേശ് ചെന്നിത്തല ഡിജിപിക്ക് നിർദ്ദേശം നൽകി. അപകടമുണ്ടാക്കിയ 17-കാരന് സ്റ്റേഷൻ ജാമ്യം അനുവദിച്ചതിൽ സംഭവിച്ച വീഴ്ചകൾ അന്വേഷിക്കാനും, ജാമ്യം റദ്ദാക്കാൻ അടിയന്തര നടപടി സ്വീകരിക്കാനും മന്ത്രി ഉത്തരവിട്ടു.
വാഹന ഉടമയായ അഡീഷണൽ ജില്ലാ ജഡ്ജിക്കെതിരെയും ആഭ്യന്തരവകുപ്പ് നിലപാട് കടുപ്പിക്കുകയാണ്. ജഡ്ജിയെ കേസിൽ പ്രതിചേർത്ത കാര്യം സർക്കാർ ഹൈക്കോടതിയെ ഔദ്യോഗികമായി അറിയിക്കും. ഇതിനുപുറമെ, ക്രമസമാധാന ചുമതലയുള്ള എഡിജിപി പി. വിജയൻ അപകടസ്ഥലം നേരിട്ടെത്തി സന്ദർശിക്കും.
ആഭ്യന്തരമന്ത്രി നേരിട്ട് ഫോണിൽ വിളിച്ച് ശക്തമായ തുടർനടപടികൾ ഉറപ്പുനൽകിയതോടെ, പൊലീസ് സ്റ്റേഷനു മുന്നിൽ ജയബാലകൃഷ്ണന്റെ കുടുംബം നടത്തിവന്ന സമരം താൽക്കാലികമായി അവസാനിപ്പിച്ചു. എന്നാൽ നാളെ വൈകിട്ട് നാലുമണിവരെ സമയം അനുവദിക്കുമെന്നും അതിനുള്ളിൽ ജഡ്ജിയെ സസ്പെൻഡ് ചെയ്യുന്നതടക്കമുള്ള തീരുമാനങ്ങൾ ഉണ്ടായില്ലെങ്കിൽ സമരം പുനരാരംഭിക്കുമെന്നും കുടുംബം വ്യക്തമാക്കി.
പ്രായപൂർത്തിയാകാത്ത മകന് ആഡംബര വാഹനം ഓടിക്കാൻ നൽകിയതിനാണ് അഡീഷണൽ ജില്ലാ ജഡ്ജിക്കെതിരെ മോട്ടോർ വാഹന നിയമം സെക്ഷൻ 199 പ്രകാരം പൊലീസ് കേസെടുത്തത്. ഇന്നലെ പുലർച്ചെ രണ്ടരയോടെ ചേരാനല്ലൂർ കണ്ടെയ്‌നർ റോഡിൽ അമിതവേഗത്തിലെത്തിയ ബെൻസ് കാറിടിച്ചാണ് മാഞ്ഞാലി സ്വദേശി ജയബാലകൃഷ്ണൻ കൊല്ലപ്പെട്ടത്. സംഭവം നടന്ന് മണിക്കൂറുകൾക്കകം പ്രതിയായ 17-കാരനെ സ്റ്റേഷൻ ജാമ്യത്തിൽ വിട്ടയച്ചത് വൻ ജനരോഷത്തിന് കാരണമായിരുന്നു. ആഭ്യന്തരമന്ത്രിയുടെ നേരിട്ടുള്ള ഇടപെടലിനെത്തുടർന്ന് പിന്നീട് പ്രതിക്കെതിരെ മനഃപൂർവമുള്ള നരഹത്യാക്കുറ്റം ചുമത്തുകയായിരുന്നു.
Leave a Reply