ചെന്നൈ: തമിഴ്‌നാട് മുഖ്യമന്ത്രി സി. ജോസഫ് വിജയ്‌യുടെ യുകെ സന്ദർശനത്തെച്ചൊല്ലി ഭരണകക്ഷിയായ ഡിഎംകെയും ടിവികെയും തമ്മിൽ വാക്പോര് മുറുകുന്നു. ബ്രിട്ടനിൽ നടന്ന ‘മാൻസ് കപ്പ്’ അന്താരാഷ്ട്ര കാർ റേസിങ് മത്സരത്തിൽ മുഖ്യമന്ത്രി മുഖ്യാതിഥിയായി പങ്കെടുത്തത് ചൂണ്ടിക്കാട്ടിയാണ് ഡിഎംകെ രൂക്ഷവിമർശനം ഉന്നയിച്ചിരിക്കുന്നത്.
വിദേശനിക്ഷേപം ആകർഷിക്കുക എന്ന ലക്ഷ്യത്തോടെയാണ് യുകെ സന്ദർശനമെന്ന് വ്യക്തമാക്കിയ മുഖ്യമന്ത്രി, സുഹൃത്ത് കൂടിയായ നടൻ അജിത് കുമാറിന്റെ കാർ റേസിങ് കാണാനാണ് പോയതെന്ന് ഡിഎംകെ വക്താവ് ടികെഎസ് ഇളങ്കോവൻ കുറ്റപ്പെടുത്തി. സംസ്ഥാനം നിലവിൽ നിരവധി നിർണായക പ്രശ്നങ്ങൾ നേരിടുമ്പോൾ, വിദേശനിക്ഷേപം ആകർഷിക്കുന്നതിന്റെ അടിയന്തര സാഹചര്യം എന്താണെന്ന് ഡിഎംകെ എംഎൽഎ മാർക്കണ്ഡേയനും ചോദിച്ചു.
പ്രതിരോധവുമായി ടിവികെ
ഡിഎംകെയുടെ വിമർശനങ്ങളെ തള്ളി ടിവികെ രംഗത്തെത്തി. ഔദ്യോഗിക സന്ദർശനത്തിനിടെ മുഖ്യമന്ത്രി സ്വന്തം സുഹൃത്തിനെ കണ്ടതിൽ അസ്വാഭാവികമായി ഒന്നുമില്ലെന്ന് ടിവികെ വക്താവ് അമരിക വി. നാരായണൻ വ്യക്തമാക്കി. തമിഴ്‌നാട്ടിലെ ജനപ്രിയ താരവും അന്താരാഷ്ട്ര തലത്തിൽ ശ്രദ്ധേയനായ റേസറുമായ അജിത് കുമാർ പങ്കെടുക്കുന്ന പരിപാടിയിൽ മുഖ്യമന്ത്രി എത്തിയത് തമിഴ്‌നാടിന്റെ അന്തസ്സ് വർദ്ധിപ്പിക്കുകയേ ഉള്ളൂ എന്നും അദ്ദേഹം ചൂണ്ടിക്കാട്ടി.
സോഷ്യൽ മീഡിയയിൽ തരംഗമായി ദൃശ്യങ്ങൾ
മാൻസ് കപ്പ് റേസിങ് മത്സരത്തിന്റെ ഫ്ലാഗ് ഓഫ് നിർവഹിച്ചത് വിജയ് ആയിരുന്നു. ചടങ്ങിനിടെ അജിത്തിനെ കണ്ട് വിജയ് ഓടിയെത്തി കെട്ടിപ്പിടിക്കുന്ന ദൃശ്യങ്ങൾ ഇതിനോടകം സോഷ്യൽ മീഡിയയിൽ വൈറലായിക്കഴിഞ്ഞു.
അതേസമയം, മത്സരവേദിയിൽ നടി തൃഷയുടെ സാന്നിധ്യവും ചർച്ചകൾക്ക് വഴിവെച്ചിട്ടുണ്ട്. മന്ത്രി ആദർശ് അർജുനയ്‌ക്കൊപ്പം മത്സരം കാണുന്നതിനിടെ തൃഷ അവിടേക്ക് എത്തുന്നതും, തൊട്ടുപിന്നാലെ വിജയ് മുഖം തിരിക്കുന്നതുമായ വീഡിയോ സോഷ്യൽ മീഡിയയിൽ വലിയ തോതിലാണ് പ്രചരിക്കുന്നത്.
Leave a Reply