പത്തനംതിട്ട: ശബരിമല, മാളികപ്പുറം മേല്‍ശാന്തിമാരെ തിരഞ്ഞെടുക്കുന്നതിനുള്ള നടപടികള്‍ അന്തിമഘട്ടത്തിലേക്ക് കടന്നതായി റിപ്പോര്‍ട്ട്. ഹൈക്കോടതി നിര്‍ദേശത്തെ തുടര്‍ന്ന് എറണാകുളം സ്വദേശികളായ ടി.എസ് വിഷ്ണു നമ്പൂതിരി, ടി.പി ഹരിനമ്പൂതിരി എന്നിവരെക്കൂടി ഉള്‍പ്പെടുത്തിക്കൊണ്ടുള്ള പുനഃക്രമീകരിച്ച മുഖാമുഖം (അഭിമുഖം) തിരുവനന്തപുരത്ത് ഇന്ന് നടക്കും. തിരുവിതാംകൂര്‍ ദേവസ്വം ബോര്‍ഡ് പ്രസിഡന്റും അംഗങ്ങളും, ഹൈക്കോടതി നിയോഗിച്ച നിരീക്ഷകനും, ശബരിമല തന്ത്രിമാരായ കണ്ഠര് ബ്രഹ്‌മദത്തന്‍, കണ്ഠര് മഹേഷ് മോഹനര്, കൂടാതെ പന്തളം കൊട്ടാരം നിര്‍ദേശിച്ച പ്രതിനിധി എന്നിവരടങ്ങുന്ന സമിതിയാണ് അഭിമുഖത്തില്‍ പങ്കെടുക്കുന്നവരുടെ യോഗ്യത വിലയിരുത്തുന്നത്.
നേരത്തെ നടന്ന മുഖാമുഖത്തില്‍ പങ്കെടുത്ത അഞ്ച് പേരും ഇതിനോടകം അന്തിമ പട്ടികയില്‍ ഇടംപിടിച്ചിട്ടുണ്ട്. സന്നിധാനത്തിന്റെയും മാളികപ്പുറത്തിന്റെയും പുതിയ മേല്‍ശാന്തിമാരെ ആരെയൊക്കെയായിരിക്കും ഹൈക്കോടതിയുടെയും ദേവസ്വം ബോര്‍ഡിന്റെയും മേല്‍നോട്ടത്തില്‍ തിരഞ്ഞെടുക്കുകയെന്ന ആകാംക്ഷയിലാണ് ഭക്തജനങ്ങളും വിശ്വാസി സമൂഹവും. ഈ വരുന്ന മാസം 18-നാണ് പുതിയ മേല്‍ശാന്തിമാരെ കണ്ടെത്താനുള്ള നറുക്കെടുപ്പ് നടക്കുന്നത്.
Leave a Reply