കാസർകോട്: സിപിഎമ്മിലെ മുതിർന്ന നേതാവും മുൻ ആഭ്യന്തര മന്ത്രി കോടിയേരി ബാലകൃഷ്ണൻ്റെ അഡീഷണൽ പ്രൈവറ്റ് സെക്രട്ടറിയുമായിരുന്ന എം. രാഘവൻ പാർട്ടിയിൽ നിന്ന് രാജിവെച്ചു. സജീവ പാർട്ടി പ്രവർത്തനം അവസാനിപ്പിക്കുന്നതായി കാണിച്ച് അദ്ദേഹം ജില്ലാ കമ്മിറ്റിക്ക് രാജിക്കത്ത് നൽകി. ഇതോടൊപ്പം പാർട്ടി നിയന്ത്രണത്തിലുള്ള കോട്ടച്ചേരി സഹകരണ ബാങ്ക് പ്രസിഡൻ്റ് സ്ഥാനവും രാഘവൻ ഒഴിഞ്ഞു.
ജില്ലാ കമ്മിറ്റിയിൽ ഉൾപ്പെടുത്താത്തതിലും നേതൃത്വം നിരന്തരമായി അവഗണിക്കുന്നതിലുമുള്ള കടുത്ത അതൃപ്തിയാണ് രാജിക്കു പിന്നിലെന്നാണ് റിപ്പോർട്ടുകൾ. ഒക്ടോബർ 15, 16 തീയതികളിൽ ചേർന്ന സിപിഎം വിപുലീകൃത ജില്ലാ കമ്മിറ്റി യോഗത്തിന് തൊട്ടുപിന്നാലെയാണ് രാഘവൻ്റെ നിർണായക നീക്കം.
ജില്ലാ കമ്മിറ്റിയിൽ ഇടമില്ല; അതൃപ്തി പുകഞ്ഞു
കാഞ്ഞങ്ങാട് ഏരിയാ സെൻ്റർ കേന്ദ്രീകരിച്ച് ദീർഘകാലമായി പ്രവർത്തിച്ചുവരികയായിരുന്ന എം. രാഘവൻ കാസർകോട് ജില്ലയിലെ പാർട്ടിയുടെ പരിചയസമ്പന്നരായ സംഘാടകരിൽ ഒരാളാണ്. കഴിഞ്ഞ ജില്ലാ സമ്മേളന വേളയിൽ തന്നെ അദ്ദേഹത്തിൻ്റെ പേര് ജില്ലാ കമ്മിറ്റിയിലേക്ക് സജീവമായി പരിഗണിക്കപ്പെട്ടിരുന്നു. എന്നാൽ അന്തിമ പട്ടിക വന്നപ്പോൾ തഴയപ്പെട്ടു. ഇതിലുള്ള അതൃപ്തി അദ്ദേഹം നേരത്തെ തന്നെ നേതൃത്വത്തെ അറിയിച്ചിരുന്നു.
തിരഞ്ഞെടുപ്പ് പരാജയവും സംഘടനാതലത്തിലെ തിരുത്തൽ നടപടികളും നേതൃത്വ പുനഃക്രമീകരണവും ചർച്ച ചെയ്യാൻ ചേർന്ന വിപുലീകൃത ജില്ലാ കമ്മിറ്റി യോഗത്തിലും അർഹമായ പ്രാതിനിധ്യം ലഭിക്കാതിരുന്നതോടെയാണ് അദ്ദേഹം പാർട്ടി വിടാൻ തീരുമാനിച്ചതെന്നാണ് സൂചന.
’50 വർഷത്തെ യാത്രയിൽ വഴിതെറ്റിപ്പോയോ?’: സോഷ്യൽ മീഡിയയിൽ കുറിപ്പ്
പാർട്ടി വിട്ടതിന് പിന്നാലെ സോഷ്യൽ മീഡിയയിൽ അദ്ദേഹം പങ്കുവെച്ച കുറിപ്പും ചർച്ചയായിട്ടുണ്ട്. “50 വർഷത്തെ യാത്രയിൽ വഴിതെറ്റിപ്പോയോ എന്നൊരു സംശയം” എന്നായിരുന്നു രാഘവൻ്റെ പ്രതികരണം. അരനൂറ്റാണ്ട് നീണ്ട രാഷ്ട്രീയ പ്രവർത്തനത്തിനൊടുവിൽ മുതിർന്നൊരു നേതാവ് നേതൃത്വത്തോട് പരസ്യമായി കലഹിച്ച് പടിയിറങ്ങിയത് കാസർകോട്ടെ സിപിഎം രാഷ്ട്രീയത്തിൽ വലിയ ചർച്ചകൾക്കാണ് വഴിതുറന്നിരിക്കുന്നത്.
Leave a Reply