നീലേശ്വരം: അഹിംസയുടെയും സഹനസമരത്തിന്റെയും ഓർമ്മകൾ പുതുക്കുന്ന ഗാന്ധി ജയന്തി ദിനത്തിലും സമരവീര്യം ചോരാതെ നീലേശ്വരത്തിന്റെ അതിജീവന പോരാട്ടം. ദേശീയപാത 66 വികസനത്തിന്റെ ഭാഗമായി നീലേശ്വരം മാർക്കറ്റ് ജംഗ്ഷനിൽ നിർമ്മിക്കുന്ന അശാസ്ത്രീയമായ മൺതിട്ടയ്ക്ക് പകരം ആകാശപാത നിർമ്മിക്കണമെന്നാവശ്യപ്പെട്ട് ജനകീയ സമരസമിതി നടത്തുന്ന അനിശ്ചിതകാല സത്യഗ്രഹ സമരം 194-ാം ദിവസത്തിലേക്ക് കടന്നു.
അധികാരികളുടെ കടുത്ത അവഗണനയ്ക്കെതിരെ വൈകിട്ട് മാർക്കറ്റ് ജംഗ്ഷനിലെ സമരപ്പന്തലിൽ നിന്നാരംഭിച്ച അഞ്ചാം ദിന റിലേ പ്രതിഷേധ ജാഥ വൻ ജനപങ്കാളിത്തത്തോടെ മന്നംപുറത്ത് സമാപിച്ചു. അനീതിക്കെതിരെ സന്ധിയില്ലാ സമരം ചെയ്ത ഗാന്ധിജിയുടെ ഓർമ്മകൾ നൽകുന്ന ഊർജ്ജത്തിലാണ് പ്രദേശവാസികൾ ഒന്നടങ്കം പ്രതിഷേധത്തിൽ അണിനിരന്നത്.
സുരക്ഷാ ഭീഷണിയും വികസന മുരടിപ്പും
നഗരത്തെ കിഴക്കും പടിഞ്ഞാറുമായി വിഭജിക്കുന്ന വന്മതിലായി മാറുന്ന ഈ മൺതിട്ട നാടിന്റെ സാമ്പത്തിക, വിനോദസഞ്ചാര, കാർഷിക മേഖലകളെ തകർക്കുമെന്ന് ജാഥയിൽ പങ്കെടുത്തവർ ചൂണ്ടിക്കാട്ടി. ഭാരം താങ്ങാൻ ശേഷിയില്ലാത്ത ചതുപ്പുനിലത്ത് ഉയർത്തുന്ന മൺതിട്ട സമീപവാസികൾക്കും സ്കൂൾ വിദ്യാർത്ഥികൾക്കും വലിയ സുരക്ഷാ ഭീഷണിയാണ് ഉയർത്തുന്നത്. ജനങ്ങളുടെ ജീവനെക്കാൾ വലുതല്ല നിർമ്മാണ പ്രവർത്തനങ്ങളെന്നും, അശാസ്ത്രീയമായ ഈ രൂപകല്പന പുനഃപരിശോധിച്ചേ തീരൂ എന്നും സമരസമിതി വ്യക്തമാക്കി.
കഴിഞ്ഞ ദിവസം മെയിൻ ക്യാരേജ് വേയിലെ നിർമ്മാണ പ്രവർത്തനങ്ങൾ തടഞ്ഞുകൊണ്ട് സമരസമിതി ശക്തമായ താക്കീത് നൽകിയിരുന്നു. മൺതിട്ട നിർമ്മാണം അടിയന്തരമായി നിർത്തിവെച്ച് നെടുങ്ങണ്ട മുതൽ കരുവച്ചേരി വരെ തൂണുകളോട് കൂടിയ ആകാശപാത നിർമ്മിക്കുക എന്ന ന്യായമായ ആവശ്യം അംഗീകരിക്കും വരെ പ്രക്ഷോഭം തുടരുമെന്ന് നേതാക്കൾ അറിയിച്ചു.
മന്നംപുറത്ത് സമാപിച്ച ജാഥയ്ക്ക് വിവിധ റസിഡൻസ് അസോസിയേഷൻ അംഗങ്ങൾ പൂർണ്ണ ഐക്യദാർഢ്യം പ്രകടിപ്പിച്ചു. വരും ദിവസങ്ങളിലും ജനകീയ പങ്കാളിത്തത്തോടെ സമരം കൂടുതൽ ശക്തമാക്കാനാണ് സമരസമിതിയുടെ തീരുമാനം.
Leave a Reply