തിരുവനന്തപുരം: മോട്ടോർ വാഹന വകുപ്പിന്റെ ഇ-ചെല്ലാനുകളിൽ നിന്നും ഗതാഗത നിയമലംഘനങ്ങളുടെ ചിത്രങ്ങൾ നീക്കം ചെയ്യുന്നുവെന്ന തരത്തിൽ പ്രചരിക്കുന്ന വാർത്തകൾ അടിസ്ഥാനരഹിതമാണെന്ന് മോട്ടോർ വാഹന വകുപ്പ് വ്യക്തമാക്കി. സമൂഹമാധ്യമങ്ങളിലൂടെയും ചില മാധ്യമങ്ങളിലൂടെയും ഇത്തരത്തിൽ വ്യാപകമായി തെറ്റായ പ്രചാരണങ്ങൾ നടക്കുന്ന സാഹചര്യത്തിലാണ് വകുപ്പ് ഔദ്യോഗിക വിശദീകരണവുമായി രംഗത്തെത്തിയത്.
വാഹനങ്ങളുടെ ക്യാമറ പരിശോധന വഴിയുള്ള നിയമലംഘന നോട്ടീസുകളിൽ ഇനി മുതൽ വാഹനങ്ങളുടെയോ നിയമലംഘനങ്ങളുടെയോ ഫോട്ടോകൾ ഉൾപ്പെടുത്തില്ല എന്ന തരത്തിലായിരുന്നു പ്രചാരണം. എന്നാൽ ഇത്തരത്തിൽ ഒരു ഉത്തരവോ നിർദ്ദേശമോ നിലവിൽ മോട്ടോർ വാഹന വകുപ്പ് നൽകിയിട്ടില്ലെന്നും വാർത്തകൾ തികച്ചും വാസ്തവവിരുദ്ധമാണെന്നും അധികൃതർ അറിയിച്ചു.
നിലവിലെ രീതി തന്നെ തുടരുമെന്നും തെറ്റായ വിവരങ്ങൾ പ്രചരിപ്പിക്കരുതെന്നും എംവിഡി പൊതുജനങ്ങൾക്ക് മുന്നറിയിപ്പ് നൽകി. ഔദ്യോഗിക പോർട്ടലായ mvd.kerala.gov.in വഴിയോ വകുപ്പിന്റെ ഔദ്യോഗിക സമൂഹമാധ്യമ അക്കൗണ്ടുകൾ വഴിയോ പങ്കുവെക്കുന്ന വിവരങ്ങൾ മാത്രം വിശ്വസിക്കണമെന്നും പൊതുജനങ്ങൾ ജാഗ്രത പാലിക്കണമെന്നും അധികൃതർ കൂട്ടിച്ചേർത്തു.
Leave a Reply