ഇന്ത്യൻ ബഹിരാകാശ രംഗത്ത് പുതിയ ചരിത്രം; ആദ്യ സ്വകാര്യ ഓർബിറ്റൽ റോക്കറ്റ് 'വിക്രം- വൺ' വിക്ഷേപണം വിജയം

ശ്രീഹരിക്കോട്ട: ഇന്ത്യയുടെ ബഹിരാകാശ ഗവേഷണ ചരിത്രത്തിൽ സുവർണ്ണ ലിപികളാൽ എഴുതപ്പെടേണ്ട പുതിയൊരു അധ്യായത്തിന് തുടക്കം കുറിച്ചുകൊണ്ട് രാജ്യത്തെ ആദ്യ സ്വകാര്യ ഓർബിറ്റൽ റോക്കറ്റായ ‘വിക്രം വൺ’ (Vikram-1) വിജയകരമായി വിക്ഷേപിച്ചു. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിൽ നിന്നായിരുന്നു ഈ ചരിത്ര വിക്ഷേപണം. ഹൈദരാബാദ് ആസ്ഥാനമായി പ്രവർത്തിക്കുന്ന പ്രമുഖ സ്പേസ് സ്റ്റാർട്ടപ്പ് കമ്പനിയായ സ്കൈറൂട്ട് എയറോസ്‌പേസ് (Skyroot Aerospace) ആണ് ഈ അത്യാധുനിക റോക്കറ്റ് നിർമിച്ചത്.

‘മിഷൻ ആഗമൻ’ (Mission Aagaman) എന്ന് പേരിട്ടിരിക്കുന്ന ഈ ദൗത്യം ആഗോള ബഹിരാകാശ വിപണിയിൽ ഇന്ത്യയുടെ സ്വകാര്യ പങ്കാളിത്തം ഉറപ്പിക്കുന്നതിൽ നിർണായക വഴിത്തിരിവാകും.

3D-പ്രിന്റിങ് സാങ്കേതികവിദ്യയും കാർബൺ കോമ്പോസിറ്റും

പൂർണ്ണമായും ഭാരം കുറഞ്ഞ കാർബൺ-കോമ്പോസിറ്റ് വസ്തുക്കൾ ഉപയോഗിച്ചാണ് 24 മീറ്റർ ഉയരമുള്ള ഈ റോക്കറ്റ് നിർമിച്ചിരിക്കുന്നത്. ഇതിന്റെ ലിക്വിഡ് എഞ്ചിനുകൾ പൂർണ്ണമായും അത്യാധുനിക 3D-പ്രിന്റിങ് സാങ്കേതികവിദ്യയിലാണ് രൂപകൽപ്പന ചെയ്തിരിക്കുന്നത് എന്നത് ഇന്ത്യൻ സാങ്കേതികവിദ്യയുടെ കരുത്ത് വിളിച്ചോതുന്നു. 21 മീറ്റർ നീളവും 24 ടൺ ഭാരവുമുള്ള വിക്രം വണ്ണിന് ഭൂമിയോട് അടുത്ത ഭ്രമണപഥത്തിൽ (Low Earth Orbit) 450 കിലോഗ്രാം ഭാരമുള്ള ഉപഗ്രഹങ്ങളെ വരെ എത്തിക്കാൻ ശേഷിയുണ്ട്.

ഉപഗ്രഹങ്ങൾക്ക് പകരം നാല് പേലോഡുകൾ; ലക്ഷ്യം ബഹിരാകാശ മാലിന്യ നിർമാർജ്ജനം

ഒരു പരീക്ഷണ ദൗത്യമായതിനാൽ ആദ്യ യാത്രയിൽ വിക്രം വണ്ണിൽ ഉപഗ്രഹങ്ങൾ ഉണ്ടായിരുന്നില്ല. അതിന് പകരം നാല് പേലോഡുകളാണ് റോക്കറ്റ് ബഹിരാകാശത്ത് എത്തിച്ചത്.

ബംഗളൂരു ആസ്ഥാനമായുള്ള സ്റ്റാർട്ട് അപ്പ് ഗ്രഹാ സ്പേസിന്റെ (Grahaa Space) ‘സോളാരസ് എസ് 3’ (Solarus S3).
കോസ്മോവേഴ്സ് സ്പേസിന്റെ (Cosmoserve Space) ‘എംബ്രേസ്’ (Embrace) എന്നീ പേലോഡുകൾ ഇതിൽ പ്രധാനപ്പെട്ടവയാണ്.

ബഹിരാകാശത്തെ അവശിഷ്ടങ്ങൾ പിടിച്ചെടുത്ത് ഭൂമിയുടെ അന്തരീക്ഷത്തിലേക്ക് തള്ളിവിട്ട് കത്തിച്ചുകളയുക വഴി അന്തരീക്ഷത്തിലെ മാലിന്യ പ്രശ്നത്തിന് പരിഹാരം കാണുകയാണ് ‘എമ്പ്രേസ്’ പേലോഡിന്റെ പ്രധാന ലക്ഷ്യം.

ശാസ്ത്രപ്രതിഭകൾക്ക് ആദരം; നിയന്ത്രണം ഇൻ-ബിൽറ്റ് ഇന്റലിജൻസിൽ

ഇന്ത്യയുടെ അഭിമാനങ്ങളായ ശാസ്ത്രജ്ഞർ സി.വി. രാമൻ, വിക്രം സാരാഭായ്, ഡോ. എ.പി.ജെ. അബ്ദുൾ കലാം എന്നിവരുടെ സൂക്ഷ്മ ശിൽപ്പങ്ങളും (Micro-art payloads) വിക്രം വൺ ഈ യാത്രയിൽ ബഹിരാകാശത്ത് എത്തിച്ചിട്ടുണ്ട്. മനുഷ്യ സഹായമില്ലാതെ കൃത്യതയോടെ പ്രവർത്തിക്കാൻ റോക്കറ്റിനെ സഹായിക്കുന്നത് ഇതിലെ പൂർണ്ണമായും ഇൻ-ബിൽറ്റ് ആയ ഇന്റലിജൻസ് സംവിധാനമാണ്.

2022 നവംബറിൽ ‘വിക്രം-എസ്’ എന്ന സബ്‌ഓർബിറ്റൽ റോക്കറ്റ് സ്കൈറൂട്ട് വിജയകരമായി പരീക്ഷിച്ച് ചരിത്രം കുറിച്ചിരുന്നു. അതിന് പിന്നാലെ കൈവരിച്ച ഈ ഓർബിറ്റൽ ദൗത്യത്തിന്റെ വിജയം ഇന്ത്യൻ ബഹിരാകാശ രംഗത്ത് സ്വകാര്യ മേഖലയുടെ വൻ കുതിച്ചുചാട്ടത്തിന് വഴിതുറക്കും.