കാസർകോട്: ജില്ലയിൽ തെരുവ് നായ ശല്യം വീണ്ടും രൂക്ഷമാകുന്നു. മദ്രസയിലേക്ക് പോവുകയായിരുന്ന എട്ടുവയസുകാരന് നേരെ തെരുവ് നായ്ക്കളുടെ കൂട്ടം പാഞ്ഞടുത്തു. കുട്ടി അത്ഭുതകരമായാണ് ആക്രമണത്തിൽ നിന്നും തലനാരിഴയ്ക്ക് രക്ഷപ്പെട്ടത്. പേടിച്ചോടുന്നതിനിടെ റോഡിൽ വീണ് കുട്ടിക്ക് പരിക്കേറ്റു.
വ്യാഴാഴ്ച രാവിലെ എട്ടരയോടെ ബന്തിയോട് അടുക്കയിലാണ് നാടിനെ നടുക്കിയ സംഭവം നടന്നത്. അടുക്ക സ്വദേശി സൈനുവിന്റെ മകൻ സയാനാണ് നായ്ക്കളുടെ ആക്രമണത്തിൽ നിന്നും കഷ്ടിച്ച് രക്ഷപ്പെട്ടത്. രാവിലെ മദ്രസയിലേക്ക് നടന്നുപോവുകയായിരുന്ന സയാന്റെ പിന്നാലെ തെരുവ് നായ്ക്കൾ കൂട്ടത്തോടെ കുരച്ചുചാടുകയായിരുന്നു.
ഭയന്നോടിയ കുട്ടി നിലതെറ്റി വീഴുകയും കാലിനും കൈകൾക്കും പരിക്കേൽക്കുകയും ചെയ്തു. പരിക്കേറ്റ സയാനെ ഉടൻ തന്നെ സമീപത്തെ ആശുപത്രിയിൽ പ്രവേശിപ്പിച്ച് പ്രാഥമിക ചികിത്സ നൽകി.
ഒരാഴ്ചയ്ക്കിടെ രണ്ടാം തവണ
ഈ ആഴ്ചയിൽ തന്നെ ഇത് രണ്ടാം തവണയാണ് സയാനെ ഇതേ പ്രദേശത്ത് വെച്ച് തെരുവ് നായ്ക്കൾ ആക്രമിക്കാൻ ശ്രമിക്കുന്നത്. ഇന്ന് രാവിലെ നടന്ന സംഭവത്തിന്റെ ഞെട്ടിക്കുന്ന ദൃശ്യങ്ങൾ സമീപത്തെ വീടിന്റെ സിസിടിവി (CCTV) ക്യാമറയിൽ പതിഞ്ഞിട്ടുണ്ട്.
പ്രദേശത്ത് തെരുവ് നായകളുടെ ശല്യം അതിരൂക്ഷമാണെന്നും കാൽനടയാത്രക്കാരും സ്കൂൾ-മദ്രസ വിദ്യാർത്ഥികളും ഭയപ്പാടോടെയാണ് വഴിനടക്കുന്നതെന്നും നാട്ടുകാർ ആരോപിച്ചു. തെരുവ് നായ ശല്യത്തിന് എത്രയും പെട്ടെന്ന് ശാശ്വത പരിഹാരം കാണാൻ അധികൃതർ തയ്യാറാകണമെന്ന് നാട്ടുകാർ ആവശ്യപ്പെട്ടു.
Leave a Reply