പുത്തൂർ: കർണാടകയിലെ പുത്തൂർ റൂറൽ പോലീസ് സ്റ്റേഷൻ പരിധിയിൽ നിന്ന് മാരുതി ഓമ്നി വാൻ മോഷ്ടിച്ച അന്തർസംസ്ഥാന വാഹന മോഷണ സംഘത്തിലെ നാല് പേരെ പുത്തൂർ റൂറൽ പോലീസ് അറസ്റ്റ് ചെയ്തു. കേരളം, തമിഴ്നാട് എന്നിവിടങ്ങളിൽ നിന്നായി പ്രത്യേക അന്വേഷണ സംഘമാണ് പ്രതികളെ പിടികൂടിയത്.
കാസർകോട് സ്വദേശികളായ അബ്ദുൾ സായിൽ ജെ. (25), മുഹമ്മദ് ആഷിഖ് (25), മുഹമ്മദ് സിറാജ് (28), തമിഴ്നാട് കരൂർ സ്വദേശി ശക്തിവേലു ജി. (24) എന്നിവരാണ് പിടിയിലായത്.
കഴിഞ്ഞ ജൂൺ 19, 20 തീയതികളിലാണ് മഡ്നൂർ കാവ് എന്ന സ്ഥലത്ത് നിന്നും മാരുതി ഓമ്നി വാൻ മോഷണം പോയത്. സംഭവത്തിൽ ഭാരതീയ ന്യായ സംഹിത (BNS) സെക്ഷൻ 303(2) പ്രകാരം പുത്തൂർ റൂറൽ പോലീസ് കേസെടുത്ത് അന്വേഷണം നടത്തിവരികയായിരുന്നു.
മോഷ്ടിച്ചത് കാസർകോട്ടേക്ക്, വിറ്റത് തമിഴ്നാട്ടിൽ
മഡ്നൂർ കാവിൽ നിന്നും മോഷ്ടിച്ച ഓമ്നി വാൻ പ്രതികൾ നേരെ കേരളത്തിലേക്ക് കടത്തുകയായിരുന്നു. തുടർന്ന് തമിഴ്നാട്ടിലെ ഇടനിലക്കാർ വഴി വാഹനം വിൽക്കുകയും അവിടെ വെച്ച് ഈ വാഹനം ആംബുലൻസാക്കി രൂപമാറ്റം വരുത്തുകയും ചെയ്തതായി പ്രതികൾ പോലീസിനോട് സമ്മതിച്ചു.
പ്രതികളിൽ നിന്ന് 2.5 ലക്ഷം രൂപയോളം വിലമതിക്കുന്ന ഓമ്നി വാനും, മോഷണത്തിന് ഉപയോഗിച്ച 1 ലക്ഷം രൂപയോളം വിലവരുന്ന കെ.ടി.എം (KTM) ബൈക്കും പോലീസ് കണ്ടെടുത്തിട്ടുണ്ട്. പിടിയിലായ പ്രതികൾക്കെതിരെ മുൻപും കാസർകോട്ടെ ബദിയഡുക്ക, വിദ്യാനഗർ പോലീസ് സ്റ്റേഷനുകളിൽ മോഷണക്കേസുകൾ നിലവിലുണ്ടെന്ന് പോലീസ് വ്യക്തമാക്കി.
പുത്തൂർ സബ് ഡിവിഷണൽ ഡിവൈ.എസ്.പി പ്രമോദ് കുമാർ, പുത്തൂർ റൂറൽ സി.ഐ തിമ്മപ്പ നായിക് എന്നിവരുടെ മേൽനോട്ടത്തിൽ പി.എസ്.ഐമാരായ ഗുണപാല ജെ., സുഷമ ജി. ഭണ്ഡാരി എന്നിവരടങ്ങിയ പ്രത്യേക അന്വേഷണ സംഘമാണ് പ്രതികളെ വലയിലാക്കിയത്. കോടതിയിൽ ഹാജരാക്കിയ പ്രതികളെ ജുഡീഷ്യൽ കസ്റ്റഡിയിൽ വിട്ടു.
Leave a Reply