തിരുവനന്തപുരം / കാസർകോട്: സംസ്ഥാനത്ത് ദേശീയപാത 66 (NH 66) ആറുവരിപ്പാത വികസനം പൂർത്തിയാകുമ്പോൾ യാത്രക്കാരുടെ പോക്കറ്റ് കീറുമെന്നുറപ്പായി. നിർമാണം പൂർത്തിയാകുന്നതോടെ കാസർകോട്ടുനിന്ന് തിരുവനന്തപുരം വരെ കാറിൽ പോയിവരാൻ ടോൾ ഇനത്തിൽ മാത്രം ഏകദേശം 6000 രൂപ വരെ നൽകേണ്ടി വരും.
2024-ലെ കണക്കുകൾ പ്രകാരം കാസർകോട്–തിരുവനന്തപുരം റൂട്ടിൽ 11 ടോൾ പ്ലാസകളിലായി ഒരു ഭാഗത്തേക്ക് 1650 രൂപയായിരുന്നു കണക്കാക്കിയിരുന്നത്. എന്നാൽ, പുതുതായി 2 ടോൾ പ്ലാസകൾ കൂടി ഉൾപ്പെടുത്തിയതിനാലും നിർമാണച്ചെലവ് ഉയർന്നതിനാലും ഒരു വശത്തേക്ക് മാത്രമുള്ള ടോൾ നിരക്ക് 3000 രൂപ വരെയായി ഉയർന്നേക്കുമെന്നാണ് ദേശീയപാത അതോറിറ്റി (NHAI) നൽകുന്ന സൂചന. ഇതോടെ ഇരുവശത്തേക്കുമായി പോയിവരുന്ന ഒരു സാധാരണ കാർ യാത്രക്കാരന് ടോൾ ഇനത്തിൽ മാത്രം 6000 രൂപ വരെ നൽകേണ്ടി വരും.
നിർമാണച്ചെലവ് വർധിച്ചെന്ന് വാദം
നിർമാണം വൈകുന്നതും ചില റീച്ചുകളിൽ നിർമാണരീതിയിലുണ്ടായ മാറ്റങ്ങളുമാണ് നിർമാണച്ചെലവ് ക്രമാതീതമായി ഉയരാൻ കാരണമായി ദേശീയപാത അതോറിറ്റി ചൂണ്ടിക്കാട്ടുന്നത്. ശരാശരി 60 കിലോമീറ്റർ ഇടവിട്ടാണ് ടോൾ ബൂത്തുകൾ സ്ഥാപിക്കുക. ഉയരപ്പാതകൾ (Elevated highway), തുരങ്കങ്ങൾ (Tunnels), വയഡക്റ്റുകൾ എന്നിവയുള്ള റീച്ചുകളിൽ സാധാരണ നിരക്കിന്റെ പത്തിരട്ടി വരെ ടോൾ ഈടാക്കാൻ വ്യവസ്ഥയുണ്ട്. അരൂർ–തുറവൂർ ഉൾപ്പെടെയുള്ള വലിയ എലിവേറ്റഡ് ഹൈവേകൾ വരുന്നതോടെ ഈ ഭാഗങ്ങളിൽ ടോൾ നിരക്ക് കുത്തനെ ഉയരും.
നിലവിലെ നിരക്കും പുതിയ പ്ലാസകളും
നിലവിൽ സംസ്ഥാനത്തെ 5 ടോൾ ബൂത്തുകളിലൂടെ കടന്നുപോകാൻ ഒരു കാറിന് ഒരു ദിശയിലേക്ക് 585 രൂപയാണ് ഈടാക്കുന്നത്.
- നിലവിൽ പ്രവർത്തിക്കുന്ന ടോൾ പ്ലാസകൾ (കാർ നിരക്ക്):
- കൊളശ്ശേരി (കണ്ണൂർ) – ₹80
- ഒളവണ്ണ (കോഴിക്കോട്) – ₹135
- വെട്ടിച്ചിറ (മലപ്പുറം) – ₹160
- കുമ്പളം (എറണാകുളം) – ₹50
- തിരുവല്ലം (തിരുവനന്തപുരം) – ₹160
- നിർമാണത്തിലുള്ള പ്രധാന ടോൾ പ്ലാസകൾ:
- ചാലിങ്കാൽ (കാസർകോട്)
- കല്യാശ്ശേരി (കണ്ണൂർ)
- അഴിയൂർ (കോഴിക്കോട്)
- നാട്ടിക (തൃശ്ശൂർ)
- എരമല്ലൂർ ഉയരപ്പാത (ആലപ്പുഴ)
- കൃപാസനം ജംക്ഷൻ (ആലപ്പുഴ)
- ഓച്ചിറ (കൊല്ലം)
- കല്ലുവാതുക്കൽ (കൊല്ലം)
പദ്ധതി പൂർണതോതിൽ യാഥാർഥ്യമാകുമ്പോൾ സംസ്ഥാനത്ത് ടോൾ നിരക്കിലുണ്ടാകുന്ന ഈ വൻ വർധനവ് സാധാരണക്കാരായ ദീർഘദൂര യാത്രക്കാർക്കും ചരക്കുനീക്കത്തിനും വലിയ തിരിച്ചടിയാകുമെന്നാണ് വിലയിരുത്തപ്പെടുന്നത്.
Leave a Reply