കാസർകോട്: കോവിഡ് കാലത്ത് നിർത്തലാക്കിയ കാസർകോട് മллаം-മംഗളൂരു കെ.എസ്.ആർ.ടി.സി. ബസ് സർവീസ് എത്രയും വേഗം പുനഃസ്ഥാപിക്കണമെന്ന് ആവശ്യപ്പെട്ട് ഗതാഗത വകുപ്പ് മന്ത്രി സി.പി. ജോണിന് മുളിയാർ പഞ്ചായത്ത് ആരോഗ്യ-വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്സൺ അനീസ മൻസൂർ മല്ലത്തിന്റെ നേതൃത്വത്തിൽ നിവേദനം നൽകി.
എസ്.ടി.യു സംസ്ഥാന സെക്രട്ടറി ഷെരീഫ് കൊടവഞ്ചി, വാർഡ് മുസ്ലിംലീഗ് പ്രസിഡണ്ട് ഹമീദ് മല്ലം, ജനറൽ സെക്രട്ടറി ഷെരീഫ് മല്ലത്ത് എന്നിവരും മന്ത്രിയെ നേരിൽ കണ്ട് നിവേദനം സമർപ്പിച്ച സംഘത്തിലുണ്ടായിരുന്നു.
നേരത്തെ വൈകിട്ട് 7.45ന് കാസർകോട് നിന്ന് മല്ലത്തേക്കും, രാവിലെ 5.30ന് മല്ലത്ത് നിന്ന് മംഗലാപുരത്തേക്കും നടത്തിയിരുന്ന ജനപ്രിയ സർവീസാണ് കോവിഡ് പ്രതിസന്ധിയെ തുടർന്ന് അധികൃതർ നിർത്തലാക്കിയത്. മല്ലം ദുർഗ്ഗാപരമേശ്വരി ക്ഷേത്രത്തിലേക്ക് എത്തുന്ന നൂറുകണക്കിന് ഭക്തജനങ്ങൾക്കും പ്രദേശത്തെ നാട്ടുകാർക്കും ഏറെ ആശ്വാസകരമായിരുന്നു ഈ ബസ് സർവീസ്. കൂടാതെ, വിദഗ്ധ ചികിത്സയ്ക്കായി നിത്യേന മംഗലാപുരത്തെ വിവിധ ആശുപത്രികളെ ആശ്രയിക്കുന്ന ഗുരുതര രോഗികളുൾപ്പെടെയുള്ളവർക്ക് ഈ സർവീസ് വലിയ തുണയായിരുന്നു.
സർവീസ് പുനഃസ്ഥാപിക്കുന്നതിനൊപ്പം യാത്രക്കാരുടെ തിരക്ക് പരിഗണിച്ച് ഈ റൂട്ടിൽ സർവീസുകളുടെ എണ്ണം വർധിപ്പിക്കണമെന്നും ജനപ്രതിനിധികളും രാഷ്ട്രീയ പാർട്ടി നേതാക്കളും ആവശ്യപ്പെട്ടു. ഇതേ ആവശ്യം ഉന്നയിച്ച് വാർഡ് മുസ്ലിംലീഗ് കമ്മിറ്റിയും ഗതാഗത മന്ത്രിക്ക് പ്രത്യേകം നിവേദനം സമർപ്പിച്ചിട്ടുണ്ട്. നാട്ടുകാരുടെയും ഭക്തരുടെയും ദുരിതയാത്രയ്ക്ക് അറുതി വരുത്താൻ കെ.എസ്.ആർ.ടി.സി അധികൃതരുടെ ഭാഗത്തുനിന്ന് അടിയന്തര ഇടപെടൽ ഉണ്ടാകുമെന്ന പ്രതീക്ഷയിലാണ് പ്രദേശം.
Leave a Reply