തിരുവനന്തപുരം: സംസ്ഥാനത്ത് അടുത്ത മാസം മുതൽ വീണ്ടും വൈദ്യുതി നിയന്ത്രണത്തിന് സാധ്യത. നവംബറിലെ രാത്രികാലങ്ങളിൽ 1,280 മെഗാവാട്ട് വരെ വൈദ്യുതിയുടെ കുറവുണ്ടായേക്കുമെന്നാണ് വിലയിരുത്തൽ. എന്നാൽ വൈദ്യുതി പ്രതിസന്ധി മറികടക്കാൻ സർക്കാർ തലത്തിൽ ഊർജ്ജിതമായ ശ്രമങ്ങൾ നടന്നുവരികയാണെന്ന് മന്ത്രി സണ്ണി ജോസഫ് വ്യക്തമാക്കി.
ഒരു മാസത്തെ ഇടവേളയ്ക്ക് ശേഷമാണ് കേരളം വീണ്ടും ലോഡ്ഷെഡിങ് ഭീഷണി നേരിടുന്നത്. വൈദ്യുതി നിയന്ത്രണം ഒഴിവാക്കാനായി കെ.എസ്.ഇ.ബി മുന്നോട്ടുവെച്ച നിർദ്ദേശങ്ങൾക്ക് റെഗുലേറ്ററി കമ്മീഷൻ അനുമതി നൽകാത്തതാണ് നിലവിലെ പ്രതിസന്ധിക്ക് പ്രധാന കാരണം. അധിക തുക ഈടാക്കുന്നുവെന്ന് ചൂണ്ടിക്കാട്ടിയാണ് കെ.എസ്.ഇ.ബിയുടെ പെറ്റീഷൻ റെഗുലേറ്ററി കമ്മീഷൻ തള്ളിയത്.
നിലവിലെ വൈദ്യുതി ക്ഷാമം ചൂണ്ടിക്കാട്ടി കഴിഞ്ഞ മാസം കെ.എസ്.ഇ.ബി സർക്കാറിന് കത്ത് നൽകിയിരുന്നു. തുടർന്ന് വൈദ്യുതി മന്ത്രി വിഷയം മുഖ്യമന്ത്രിയുടെ ഓഫീസിന് കൈമാറിയെങ്കിലും ഇതുവരെ അന്തിമ തീരുമാനം ഉണ്ടായിട്ടില്ല. അതേസമയം, സാഹചര്യം നേരിടാൻ സർക്കാർ സാധ്യമായ എല്ലാ നടപടികളും സ്വീകരിക്കുന്നുണ്ടെന്ന് മന്ത്രി സണ്ണി ജോസഫ് അറിയിച്ചു.
ഇതിനിടെ, കേരളത്തിന്റെ ഭാഗത്തുനിന്നുണ്ടായ കാലതാമസം കാരണം കുറഞ്ഞ നിരക്കിൽ വൈദ്യുതി വാഗ്ദാനം ചെയ്തിരുന്ന ഹിമാചൽ പ്രദേശ് കരാറിൽ നിന്ന് പിന്മാറി. കൂടാതെ, വിപണിയിൽ നിന്നുള്ള വൈദ്യുതി ലഭ്യത ഇപ്പോഴും പഴയ നിലയിലേക്ക് എത്തിയിട്ടില്ലെന്ന് കേരള ഇലക്ട്രിസിറ്റി ഓഫീസേഴ്‌സ് കോൺഫെഡറേഷൻ ജനറൽ സെക്രട്ടറി പി.എസ്. പ്രശാന്ത് പറഞ്ഞു. വരുന്ന മാസങ്ങളിൽ രാത്രി സമയങ്ങളിൽ അനുഭവപ്പെടുന്ന വലിയ കമ്മി പരിഹരിക്കാൻ വൈദ്യുതി നിയന്ത്രണം ഏർപ്പെടുത്തേണ്ട സാഹചര്യമാണ് നിലവിലുള്ളത്.
Leave a Reply