കാസർകോട്: ജനങ്ങളുടെ ഉറക്കം കെടുത്തുന്ന രീതിയിൽ കൽമാടിത്തോട് മാലിന്യ നിക്ഷേപ കേന്ദ്രമായി മാറിയതിനെതിരെ ഒടുവിൽ ജില്ലാ ഭരണകൂടത്തിന്റെ കർശന ഇടപെടൽ. നെല്ലിക്കുന്ന്, ബങ്കരക്കുന്ന്, കടപ്പുറം പ്രദേശങ്ങളിലൂടെ ഒഴുകുന്ന കൽമാടിത്തോട്ടിലെ മലിനീകരണ പ്രശ്നങ്ങൾക്ക് അടിയന്തര പരിഹാരം കാണാൻ ജില്ലാ കളക്ടർ അർജുൻ പാണ്ഡ്യൻ നേരിട്ടെത്തി സ്ഥിതിഗതികൾ വിലയിരുത്തി. തോട്ടിലേക്ക് മാലിന്യം തള്ളുന്നവർക്കെതിരെ കർശന നിയമനടപടിയും വൻ തുക പിഴയും ഈടാക്കാനാണ് കളക്ടറുടെ ഉത്തരവ്.
മാധ്യമ വാർത്തകൾക്ക് പിന്നാലെ കളക്ടറുടെ സന്ദർശനം
തോട്ടിലെ കടുത്ത മലിനീകരണവും ദുർഗന്ധവും കാരണം പ്രദേശവാസികൾ അനുഭവിക്കുന്ന സമാനതകളില്ലാത്ത ആരോഗ്യപ്രശ്നങ്ങളെക്കുറിച്ച് ‘മാതൃഭൂമി’ വാർത്ത നൽകിയിരുന്നു. ഇതേത്തുടർന്നാണ് കളക്ടറുടെ അടിയന്തര സന്ദർശനം. കസബ പാലം, നെല്ലിക്കുന്ന് കടപ്പുറം പാലം എന്നിവടങ്ങളിലാണ് കളക്ടറും സംഘവും പരിശോധന നടത്തിയത്.
പാലം നിർമാണ സമയത്ത് താൽക്കാലികമായി നിർമിച്ച റോഡിന്റെ അവശിഷ്ടങ്ങൾ ഇതുവരെ മാറ്റിയിരുന്നില്ല. ഇത് നീരൊഴുക്ക് തടസ്സപ്പെടുത്തുന്നതായി ശ്രദ്ധയിൽപ്പെട്ടതിനെ തുടർന്ന്, ഈ അവശിഷ്ടങ്ങൾ അടിയന്തരമായി എടുത്തുമാറ്റാൻ ചെറുകിട ജലസേചന വകുപ്പിനും പൊതുമരാമത്ത് പാലം വിഭാഗത്തിനും കളക്ടർ കർശന നിർദേശം നൽകി.
മാലിന്യം തള്ളുന്നവർക്കെതിരെ എൻഫോഴ്സ്മെന്റ് സ്ക്വാഡ്
ഇനി മുതൽ തോട്ടിലേക്ക് മാലിന്യം തള്ളുന്നത് തടയാൻ എൻഫോഴ്സ്മെന്റ് സ്ക്വാഡിന്റെ പ്രവർത്തനം ശക്തമാക്കും. നിയമലംഘകരെ കണ്ടെത്താൻ സിസിടിവി നിരീക്ഷണവും പരിശോധനകളും കർശനമാക്കാനാണ് തീരുമാനം.
തോട് പൂർണ്ണമായും ശുചീകരിക്കുന്നതിനായി ജനപ്രതിനിധികൾ, വിവിധ വകുപ്പ് ഉദ്യോഗസ്ഥർ, സന്നദ്ധ സംഘടനകൾ എന്നിവരെ ഉൾപ്പെടുത്തി അടിയന്തര യോഗം ചേരാനും കളക്ടർ നിർദേശിച്ചിട്ടുണ്ട്.
കാസർകോട് നഗരസഭാധ്യക്ഷ ഷാഹിന സലീം, വൈസ് ചെയർപേഴ്സൺ കെ.എം. ഹനീഫ്, സ്ഥിരം സമിതി അധ്യക്ഷരായ മെഹറുന്നീസ ഹമീദ്, സമീന മുജീബ്, ജാഫർ കമാൽ, ഹമീദ് ബെദിര, സെക്രട്ടറി കെ.ഷാജു, രഞ്ജിഷ, ഷെറിൽ ബാബു തുടങ്ങിയ പ്രമുഖരും കളക്ടർക്കൊപ്പമുണ്ടായിരുന്നു.
Leave a Reply