പുരുഷ സ്വയം സഹായ സംഘത്തിന് നൂറുമേനി വിജയം; രാവണീശ്വരത്തെ ചെണ്ടുമല്ലിപ്പാടത്ത് വിളവെടുപ്പ് തുടങ്ങി

കാഞ്ഞങ്ങാട്: ഓണവിപണിയും നാടിന്റെ സൗന്ദര്യവും ലക്ഷ്യമിട്ട് രാവണീശ്വരത്ത് ഒരുക്കിയ ചെണ്ടുമല്ലി പൂപ്പാടം കൺകുളിർക്കുന്ന കാഴ്ചയാകുന്നു. രാവണീശ്വരം ഗവ. ഹയർ സെക്കണ്ടറി സ്‌കൂളിന് പിൻവശത്താണ് മഞ്ഞയും ഓറഞ്ചും നിറങ്ങളിൽ ചെണ്ടുമല്ലി പൂക്കൾ സമൃദ്ധമായി വിരിഞ്ഞുനിൽക്കുന്നത്.

കൂട്ടായ്മയിൽ വിരിഞ്ഞ പൂവസന്തം

രാവണീശ്വരം പുരുഷ സ്വയം സഹായ സംഘത്തിന്റെ നേതൃത്വത്തിലാണ് ഈ മാതൃകാ കൃഷി ഒരുക്കിയത്. കരിമ്പിൽ കരുണാകരന്റെ കുടുംബം സൗജന്യമായി വിട്ടുനൽകിയ സ്ഥലത്താണ് കൃഷിയിറക്കിയത്. കരിന്തളത്തെ കർഷകനായ ജോസഫിൽ നിന്ന് ശേഖരിച്ച 1,700 ഹൈബ്രിഡ് ചെണ്ടുമല്ലി തൈകളാണ് ഇവിടെ നട്ടുപരിപാലിച്ചത്.

സംഘം പ്രസിഡന്റ് രവീന്ദ്രൻ കാപ്പിൽ വളപ്പിൽ, സെക്രട്ടറി എം. സുകേഷ് എന്നിവരുൾപ്പെടെയുള്ള 11 അംഗങ്ങളുടെ ചിട്ടയായ അധ്വാനവും അജാനൂർ കൃഷിഭവന്റെ കൃത്യമായ മാർഗനിർദ്ദേശങ്ങളുമാണ് കൃഷിയുടെ വിജയത്തിന് പിന്നിൽ.

സഞ്ചാരികളുടെ ഇഷ്ടകേന്ദ്രം; മികച്ച വിളവ് പ്രതീക്ഷ

ഏഴ് ക്വിന്റലോളം പൂക്കളുടെ വിളവെടുപ്പാണ് സംഘം പ്രതീക്ഷിക്കുന്നത്. വിപണനത്തിന് പുറമെ, പൂപ്പാടത്തിന്റെ ഭംഗി ആസ്വദിക്കാനും ഫോട്ടോഷൂട്ടിനുമായി ദിവസേന നിരവധി ആളുകളാണ് ഇവിടേക്ക് എത്തുന്നത്.

ചെണ്ടുമല്ലി പൂപ്പാടത്തിന്റെ വിളവെടുപ്പ് ഉത്സവം ജില്ലാ പഞ്ചായത്ത് പ്രസിഡന്റ് സാബു അബ്രഹാം ഉദ്ഘാടനം ചെയ്തു.