കാസർകോട്: വിദേശരാജ്യങ്ങളിൽ നിന്നടക്കം കോടിക്കണക്കിന് രൂപയുടെ അനധികൃത പണമിടപാടുകൾ നടന്നെന്ന വിവരത്തെത്തുടർന്ന് കാസർകോട് ജില്ലയിൽ വ്യാപക പൊലീസ് റെയ്ഡ്. ‘ഓപ്പറേഷൻ സി.വൈ ഹണ്ട്’ (Operation CY Hunt) എന്ന പേരിൽ സൈബർ പൊലീസിന്റെ സഹായത്തോടെ നടത്തിയ പ്രത്യേക പരിശോധനയിൽ 26 പേർ പിടിയിലായി.
അനധികൃതമായി പണം കൈമാറ്റം ചെയ്യുന്നതിനായി സൗകര്യങ്ങളും ഒത്താശയും ചെയ്തുകൊടുത്തവരാണ് പിടിയിലായതെന്ന് പൊലീസ് അറിയിച്ചു. ഇവരിൽ നിന്ന് മൊബൈൽ ഫോണുകളും ബാങ്ക് ഇടപാട് രേഖകളും കസ്റ്റഡിയിലെടുത്തിട്ടുണ്ട്. കൂടുതൽ ശാസ്ത്രീയ പരിശോധനകൾക്ക് ശേഷമേ തുടർനടപടികൾ സ്വീകരിക്കൂ എന്ന് പൊലീസ് വ്യക്തമാക്കി.
റെയ്ഡിൽ ജില്ലയിലെ വിവിധ സ്റ്റേഷനുകളിലായി നിരവധി കേസുകളാണ് രജിസ്റ്റർ ചെയ്തിട്ടുള്ളത്:
- മേൽപ്പറമ്പ്: 6 കേസുകൾ (ഏറ്റവും കൂടുതൽ)
- കാസർകോട്: 5 കേസുകൾ
- വിദ്യാനഗർ: 5 കേസുകൾ
- ഹൊസ്ദുർഗ്ഗ്: 4 കേസുകൾ
- മഞ്ചേശ്വരം, ബേഡകം, ചന്തേര, നീലേശ്വരം, വെള്ളരിക്കുണ്ട്: ഓരോ കേസ് വീതം
സംഭവത്തിൽ രാജ്യാന്തര സാമ്പത്തിക തട്ടിപ്പ് സംഘങ്ങളുടെ പങ്കാളിത്തം ഉൾപ്പെടെയുള്ള കാര്യങ്ങൾ സൈബർ പൊലീസ് വിശദമായി അന്വേഷിച്ചു വരികയാണ്.
Leave a Reply