ബദിയടുക്ക: കുമ്പള സബ് ജില്ലാ സ്കൂൾ കലോത്സവ വേദിയിലുണ്ടായ അനിഷ്ട സംഭവങ്ങളിൽ ഉൾപ്പെട്ടവർക്കെതിരെ കർശന നിയമനടപടി സ്വീകരിക്കണമെന്ന് മുസ്ലിം യൂത്ത് ലീഗ് ബദിയടുക്ക പഞ്ചായത്ത് കമ്മിറ്റി ആവശ്യപ്പെട്ടു.
നവജീവന ഹയർ സെക്കൻഡറി സ്കൂളിൽ നടക്കുന്ന കലോത്സവ വേദിയിലായിരുന്നു സംഘർഷാവസ്ഥ ഉടലെടുത്തത്. മാസങ്ങളോളം പരിശീലനം നടത്തി തങ്ങളുടെ കലാശേഷി മാറ്റുരയ്ക്കാനെത്തിയ വിദ്യാർത്ഥികൾക്ക് നേരെ ഇത്തരം പ്രവണതകൾ ഉണ്ടായത് ദൗർഭാഗ്യകരമാണെന്നും, വേദികളിൽ കുട്ടികളുടെ സുരക്ഷ ഉറപ്പാക്കാൻ സമൂഹം ജാഗ്രത പുലർത്തണമെന്നും നേതാക്കൾ അഭിപ്രായപ്പെട്ടു.
വിദ്യാലയങ്ങളും കലോത്സവ വേദികളും കുട്ടികൾക്ക് ഭയരഹിതമായി പ്രവർത്തിക്കാനുള്ള ഇടങ്ങളാണെന്നും, അവിടങ്ങളിൽ അച്ചടക്കവും സമാധാനാന്തരീക്ഷവും കാത്തുസൂക്ഷിക്കാൻ അധികൃതർ ശ്രദ്ധിക്കണമെന്നും സംഘടന ചൂണ്ടിക്കാട്ടി. സംഭവത്തിൽ കൃത്യമായ അന്വേഷണം നടത്തി ഉത്തരവാദികൾക്കെതിരെ പക്ഷഭേദമില്ലാതെ നടപടിയെടുക്കാൻ പോലീസ് തയ്യാറാകണം.
വിദ്യാർത്ഥികളുടെയും പൊതുസമൂഹത്തിന്റെയും സുരക്ഷ മുൻനിർത്തി അധികാരികൾ ആവശ്യമായ മുൻകരുതലുകൾ സ്വീകരിക്കണമെന്നും മുസ്ലിം യൂത്ത് ലീഗ് ബദിയടുക്ക പഞ്ചായത്ത് പ്രസിഡന്റ് അർഷാദ് കന്യപ്പാടി, ജനറൽ സെക്രട്ടറി മുസ്തഫ കടമന എന്നിവർ പ്രസ്താവനയിലൂടെ അഭ്യർത്ഥിച്ചു.
Leave a Reply