കൊച്ചി: ചേരാനല്ലൂരിൽ 17 വയസ്സുകാരൻ ഓടിച്ച ആഡംബര കാറിടിച്ച് സ്കൂട്ടർ യാത്രികൻ മരിച്ച സംഭവത്തിൽ വാഹന ഉടമയായ അഡീഷണൽ സെഷൻസ് ജഡ്ജിക്കെതിരെ പോലീസ് കേസെടുത്തു. ഹൈക്കോടതിയുടെ അനുമതി തേടിയ ശേഷമാണ് പ്രായപൂർത്തിയാകാത്ത മകന് കാർ ഓടിക്കാൻ നൽകിയതിന് പിതാവിനെതിരെ മോട്ടോർ വാഹന നിയമപ്രകാരം നടപടിയെടുത്തത്. ഇതിനുപുറമെ, പ്രതിയായ പതിനേഴുകാരന് ലഭിച്ച ജാമ്യം റദ്ദാക്കണമെന്ന് ആവശ്യപ്പെട്ട് എറണാകുളം ജില്ലാ സെഷൻസ് കോടതിയിൽ അപേക്ഷ നൽകാനും പോലീസ് തീരുമാനിച്ചു.
അപകടമുണ്ടാക്കിയ പതിനേഴുകാരൻ സ്ഥിരമായി കാറോടിക്കുന്ന ആളാണെന്നാണ് പോലീസ് കണ്ടെത്തൽ. അമിതവേഗതയിൽ വാഹനം പായിക്കുന്നതിന്റെ സോഷ്യൽ മീഡിയ റീൽസ് ചിത്രീകരിക്കാനാണ് ഇയാൾ രാത്രി വൈകി ബെൻസ് കാറുമായി റോഡിലിറങ്ങിയത്. അപകടം നടക്കുന്നതിന് തൊട്ടുമുമ്പ് വാഹനം 104 കിലോമീറ്റർ വേഗതയിൽ ഓടിക്കുന്നതിന്റെ ദൃശ്യങ്ങളും പോലീസിന് ലഭിച്ചിട്ടുണ്ട്. ലൈസൻസില്ലാതെ വാഹനമോടിച്ചതിനും അമിതവേഗതയ്ക്കും മോട്ടോർ വാഹന നിയമത്തിലെ 181, 183 വകുപ്പുകൾക്ക് പുറമെ മനഃപൂർവമുള്ള നരഹത്യാക്കുറ്റവും (Culpable Homicide) പ്രതിക്കെതിരെ ചുമത്തിയിട്ടുണ്ട്.
ഞായറാഴ്ച പുലർച്ചെ കണ്ടെയ്നർ റോഡിൽ ചേരാനല്ലൂർ മാരാപറമ്പ് സ്റ്റോപ്പിന് സമീപമായിരുന്നു നാടിനെ നടുക്കിയ ദുരന്തം. ചിറ്റൂരിൽ തട്ടുകട നടത്തിയിരുന്ന മാഞ്ഞാലി സ്വദേശി ജയബാലകൃഷ്ണൻ (55) ജോലി കഴിഞ്ഞ് സ്കൂട്ടറിൽ വീട്ടിലേക്ക് മടങ്ങുമ്പോഴാണ് അമിതവേഗതയിലെത്തിയ ബെൻസ് കാർ പിന്നിൽനിന്ന് ഇടിച്ചുതെറിപ്പിച്ചത്. ഗുരുതരമായി പരിക്കേറ്റ ജയബാലകൃഷ്ണൻ സംഭവസ്ഥലത്തുതന്നെ മരിച്ചു.
അപകടത്തിന് പിന്നാലെ കസ്റ്റഡിയിലെടുത്ത പ്രതിയെ ഞായറാഴ്ച വൈകിട്ടോടെ സ്റ്റേഷൻ ജാമ്യത്തിൽ വിട്ടയച്ച സംഭവം വൻ വിവാദങ്ങൾക്കാണ് വഴിവെച്ചത്. പോലീസിന്റെ ഒത്തുകളി ആരോപിച്ച് മരിച്ച ജയബാലകൃഷ്ണന്റെ കുടുംബാംഗങ്ങൾ ചേരാനല്ലൂർ പോലീസ് സ്റ്റേഷന് മുന്നിൽ കുത്തിയിരുന്ന് ശക്തമായ പ്രതിഷേധം നടത്തിയിരുന്നു. പ്രതിഷേധത്തിനിടെ ജയബാലകൃഷ്ണന്റെ മകൾ തളർന്നുവീണത് രംഗം കൂടുതൽ വൈകാരികമാക്കി. പ്രമുഖർ ഉൾപ്പെട്ട കേസ് അട്ടിമറിക്കാൻ സമ്മതിക്കില്ലെന്നും നീതിക്കായി ഏതറ്റം വരെയും നിയമപോരാട്ടം നടത്തുമെന്നും കുടുംബം വ്യക്തമാക്കി. കുടുംബത്തിന്റെ പ്രതിഷേധവും രാഷ്ട്രീയ സംഘടനകളുടെ ഇടപെടലുകളും ശക്തമായതോടെയാണ് പോലീസ് നടപടികൾ കടുപ്പിച്ചത്.
Leave a Reply