കാസർകോട്: ജില്ലയിൽ അടുത്ത മൂന്ന് മണിക്കൂറിൽ അതിജാഗ്രതാ നിർദേശം. കാസർകോട് ഉൾപ്പെടെയുള്ള ജില്ലകളിൽ കാലാവസ്ഥാ വകുപ്പ് താൽക്കാലികമായി ഓറഞ്ച് അലർട്ട് പ്രഖ്യാപിച്ചു. രാത്രി 7 മണിക്ക് പുറപ്പെടുവിച്ച നൗകാസ്റ്റ് (Nowcast) പ്രകാരം അടുത്ത മൂന്ന് മണിക്കൂറിൽ ജില്ലയിൽ ഇടിമിന്നലോട് കൂടിയ ഇടത്തരം മഴയ്ക്കും മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ട്.
കാസർകോടിന് പുറമെ തെക്കൻ ജില്ലകളായ കൊല്ലം, പത്തനംതിട്ട, ആലപ്പുഴ ജില്ലകളിലും ഈ മൂന്ന് മണിക്കൂർ സമയത്തേക്ക് ഓറഞ്ച് അലർട്ട് ബാധകമാണ്. സംസ്ഥാനത്തെ മറ്റ് ജില്ലകളിലും ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ മഴയ്ക്കും മണിക്കൂറിൽ 40 കിലോമീറ്റർ വരെ വേഗതയുള്ള കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പും സംസ്ഥാന ദുരന്ത നിവാരണ അതോറിറ്റിയും (KSDMA) അറിയിച്ചു.
പ്രത്യേക ജാഗ്രതാ നിർദേശങ്ങൾ:
- ഇടിമിന്നൽ സാധ്യതയുള്ളതിനാൽ കാറ്റും മഴയും തുടങ്ങുമ്പോൾ തന്നെ തുറസ്സായ സ്ഥലങ്ങളിൽ നിൽക്കുന്നത് ഒഴിവാക്കുക; സുരക്ഷിതമായ കെട്ടിടങ്ങളിലേക്ക് മാറുക.
- ശക്തമായ കാറ്റിൽ മരങ്ങൾ ഒടിഞ്ഞുവീഴാനും വൈദ്യുതി പോസ്റ്റുകൾ തകരാറിലാകാനും സാധ്യതയുള്ളതിനാൽ യാത്രക്കാർ അതീവ ജാഗ്രത പാലിക്കുക.
- മരങ്ങളുടെ ചുവട്ടിലോ അപകടാവസ്ഥയിലുള്ള ബോർഡുകൾക്ക് താഴെയോ വാഹനങ്ങൾ പാർക്ക് ചെയ്യരുത്.
- ജനൽ, വാതിലുകൾ എന്നിവ സുരക്ഷിതമായി അടച്ചിടുക.
Leave a Reply