തിരുവനന്തപുരം: കേരളം കണ്ട ഏറ്റവും വലിയ പിടികിട്ടാപ്പുള്ളി സുകുമാരക്കുറുപ്പിന്റേത് എന്ന പേരിൽ സോഷ്യൽ മീഡിയയിൽ പ്രചരിച്ച ചിത്രം മറ്റൊരാളുടേതെന്ന് സ്ഥിരീകരിച്ച് കേരള പൊലീസ്. തൃശൂർ വടക്കാഞ്ചേരി കരുമത്ര സ്വദേശിയായ ദാമോദര മേനോന്റെ ചിത്രമാണ് സുകുമാരക്കുറുപ്പിന്റേതെന്ന രീതിയിൽ വ്യാപകമായി പ്രചരിച്ചത്. പ്രചരിക്കുന്ന ഫോട്ടോ സുകുമാരക്കുറുപ്പിന്റേതല്ലെന്നും ദാമോദര മേനോന്റേതാണെന്നതുമാണ് പ്രാഥമിക നിഗമനമെന്ന് സ്പെഷ്യൽ ബ്രാഞ്ച് എസിപി ബിജോയ് തോമസ് വ്യക്തമാക്കി.
പൊലീസ് അന്വേഷണവും സ്ഥിരീകരണവും:
- ഫോൺ സംഭാഷണം: ദാമോദര മേനോനുമായി സ്പെഷ്യൽ ബ്രാഞ്ച് എസിപി നേരിട്ട് ഫോണിൽ സംസാരിച്ചു. നിലവിൽ ചില ആരോഗ്യപ്രശ്നങ്ങൾ ഉണ്ടെന്നും ഉടൻ തന്നെ നാട്ടിലേക്ക് വരാൻ ശ്രമിക്കുകയാണെന്നും അദ്ദേഹം പൊലീസിനെ അറിയിച്ചിട്ടുണ്ട്.
- ഭൂമിയുടെ രേഖകൾ: കരുമത്രയിൽ ദാമോദര മേനോന്റെ പേരിൽ പത്തു സെന്റ് ഭൂമിയുണ്ട്. ഇതുമായി ബന്ധപ്പെട്ട രേഖകൾ പൊലീസ് പരിശോധിച്ചു.
- കുടുംബത്തിന്റെ സാക്ഷ്യം: പ്രചരിക്കുന്ന ഫോട്ടോയും പാസ്പോർട്ടും ദാമോദര മേനോന്റേത് തന്നെയെന്ന് അദ്ദേഹത്തിന്റെ കുടുംബാംഗങ്ങളും തിരിച്ചറിഞ്ഞു. സംഭവത്തിൽ കൂടുതൽ വിശദമായ അന്വേഷണം നടത്തുമെന്നും പൊലീസ് വ്യക്തമാക്കി.
പാസ്പോർട്ട് ദാമോദര മേനോന്റേത് തന്നെ: സഹോദരൻ
സുകുമാരക്കുറുപ്പിന്റേതെന്ന പേരിൽ പ്രചരിച്ച പാസ്പോർട്ട് ദാമോദര മേനോന്റേത് തന്നെയാണെന്ന് അദ്ദേഹത്തിന്റെ സഹോദരൻ കരുണാകരൻ വ്യക്തമാക്കി.
- 40 വർഷങ്ങൾക്ക് മുമ്പാണ് ദാമോദര മേനോൻ മലേഷ്യയിലേക്ക് പോകുന്നത്.
- പാലക്കാട് സ്വദേശിനിയെയാണ് അവിടെവെച്ച് വിവാഹം കഴിച്ചത്. ഇവർക്ക് രണ്ട് മക്കളുണ്ട്.
- നിലവിൽ മലേഷ്യയിൽ ഉണ്ടായ ഒരു അപകടത്തെ തുടർന്ന് ചികിത്സയിലാണ് അദ്ദേഹം.
- ഒരു മാസം മുമ്പും വീട്ടിലേക്ക് വിളിച്ചിരുന്നതായും കുടുംബവുമായി നിരന്തരം ബന്ധപ്പെടാറുണ്ടെന്നും സഹോദരൻ കൂട്ടിച്ചേർത്തു.
42 വർഷമായി ക്രൈംബ്രാഞ്ചും കേരള പൊലീസും തെരയുന്ന ചാക്കോ വധക്കേസ് പ്രതി സുകുമാരക്കുറുപ്പുമായി സാദൃശ്യമുള്ള വ്യക്തിയെക്കുറിച്ച് മലേഷ്യയിലും ഇന്തോനേഷ്യയിലുമുള്ള ചില ഇന്ത്യക്കാരാണ് പൊലീസിന് അനൗദ്യോഗികമായി വിവരം നൽകിയത്. ഇതിനെത്തുടർന്ന് നടത്തിയ അന്വേഷണത്തിലാണ് പ്രചരിച്ച വിവരങ്ങൾ തെറ്റാണെന്ന് തെളിഞ്ഞത്.
Leave a Reply