കാസർകോട്: ട്രെയിൻ യാത്രയ്ക്കിടെ റെയിൽവേ സ്റ്റേഷനിൽ അബദ്ധത്തിൽ മറന്നുവെച്ച 63,000 രൂപയും ബാഗും ഉടമയ്ക്ക് തിരികെ നൽകി റെയിൽവേ താൽക്കാലിക ക്ലീനിങ് ജീവനക്കാരി മാതൃകയായി. തളങ്കര ഗവൺമെന്റ് ഹയർ സെക്കൻഡറി സ്കൂൾ ഹെഡ്മിസ്ട്രസ് ബിന്ദുവിനാണ് നഷ്ടപ്പെട്ടുവെന്ന് കരുതിയ പണവും രേഖകളും തിരിച്ചുകിട്ടിയത്. ബാഗ് കണ്ടെത്തി ഉടൻതന്നെ അധികൃതർക്ക് കൈമാറിയ ശുചീകരണ ജീവനക്കാരി സജിനിയുടെ സത്യസന്ധതയ്ക്ക് യാത്രക്കാരും റെയിൽവേ അധികൃതരും അഭിനന്ദനങ്ങൾ അറിയിച്ചു.
സംഭവം ഇങ്ങനെ:
കഴിഞ്ഞ ആഗസ്റ്റ് 15-ന് രാവിലെ 11 മണിയോടെയാണ് സംഭവം. കാസർകോട് റെയിൽവേ സ്റ്റേഷനിലെത്തിയ അധ്യാപിക അബദ്ധത്തിൽ പണമടങ്ങിയ ബാഗ് പ്ലാറ്റ്ഫോമിൽ മറന്നുവെച്ച് ട്രെയിനിൽ കയറുകയായിരുന്നു. യാത്രയ്ക്കിടെയാണ് പണവും ബാഗും നഷ്ടപ്പെട്ട കാര്യം അധ്യാപികയുടെ ശ്രദ്ധയിൽപ്പെടുന്നത്.
അതേസമയം, പ്ലാറ്റ്ഫോം ശുചീകരണത്തിനിടെ ഉപേക്ഷിക്കപ്പെട്ട നിലയിൽ കണ്ടെത്തിയ ബാഗ് ജീവനക്കാരിയായ സജിനി ഉടൻതന്നെ റെയിൽവേ പ്രൊട്ടക്ഷൻ ഫോഴ്സിന് (RPF) കൈമാറുകയായിരുന്നു. തുടർന്ന് ആർ.പി.എഫ് ഉദ്യോഗസ്ഥർ നടത്തിയ അന്വേഷണത്തിലാണ് ബാഗ് തളങ്കര ജി.എച്ച്.എസ്.എസ് പ്രധാനാധ്യാപികയുടേതാണെന്ന് തിരിച്ചറിഞ്ഞത്.
ബാഗ് തിരികെ നൽകി
തുടർന്ന് അധ്യാപികയെ സ്റ്റേഷനിലേക്ക് വിളിച്ചുവരുത്തുകയും ചൊവ്വാഴ്ച ആർ.പി.എഫ് ഉദ്യോഗസ്ഥരുടെ സാന്നിധ്യത്തിൽ സജിനി നേരിട്ട് 63,000 രൂപയും ബാഗും കൈമാറുകയും ചെയ്തു.
യാത്രക്കാരുടെ സാധനങ്ങൾ സംരക്ഷിക്കുന്നതിലും ഉത്തരവാദിത്തം നിർവഹിക്കുന്നതിലും സജിനിയും ആർ.പി.എഫും കാണിച്ച ജാഗ്രതയും സത്യസന്ധതയും വലിയ പ്രശംസയാണ് നേടിയത്.
Leave a Reply