കൊച്ചിയിൽ കാർ ബൈക്കിലിടിച്ചുണ്ടായ അപകടത്തിൽ കാസർകോട് സ്വദേശിനിക്ക് ദാരുണാന്ത്യം

കൊച്ചി: അങ്കമാലിയിൽ കാർ ബൈക്കിലിടിച്ചുണ്ടായ വാഹനാപകടത്തിൽ കാസർകോട് സ്വദേശിനിയായ യുവതി മരിച്ചു. ബദിയഡുക്ക പൊലീസ് സ്റ്റേഷൻ പരിധിയിലെ നെല്ലിക്കട്ട സ്വദേശിനി പരേതനായ മുഹമ്മദിന്റെ മകൾ ഇഷാന ഇസ്‌മത്ത് (22) ആണ് മരിച്ചത്. തിങ്കളാഴ്ച പുലർച്ചെ അങ്കമാലി അത്താണി എയർപോർട്ട് വിഐപി റോഡിലെ പെട്രോൾ പമ്പിന് സമീപമായിരുന്നു ദാരുണമായ ഈ അപകടം നടന്നത്.
അപകടത്തിൽ ഇഷാനയുടെ സുഹൃത്തും കാസർകോട് സ്വദേശിയുമായ സർഫാത്തിന് സാരമായി പരിക്കേറ്റു. ഇദ്ദേഹത്തെ ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. അമിതവേഗതയിലെത്തിയ സ്വിഫ്റ്റ് കാർ ഇവർ സഞ്ചരിച്ചിരുന്ന ബൈക്കിൽ ഇടിക്കുകയായിരുന്നുവെന്നാണ് പ്രാഥമിക നിഗമനം. ബൈക്കിന്റെ പിൻസീറ്റിലായിരുന്നു ഇഷാന ഇസ്‌മത്ത് ഇരുന്നിരുന്നത്.
സംഭവത്തിൽ നെടുമ്പാശ്ശേരി പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. നിലവിൽ അങ്കമാലി എൽ.എഫ് ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം പോസ്റ്റ്‌മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും. പരിക്കേറ്റ സർഫാത്തിന്റെ ആരോഗ്യനില സംബന്ധിച്ച കൂടുതൽ വിവരങ്ങൾ ലഭ്യമായിട്ടില്ല.