കമ്പാര്: ജി.എല്.പി.എസ് കമ്പാറിലെ 51-ാം മത് വാര്ഷികാഘോഷവും പ്രിയപ്പെട്ട പ്രധാനാധ്യാപകന് അമ്മു മാസ്റ്ററുടെ വിടവാങ്ങല് ചടങ്ങും മാര്ച്ച് 23-ന് ഹൃദയസ്പര്ശിയായ അന്തരീക്ഷത്തില് നടന്നു.
വിദ്യാര്ത്ഥികളും അധ്യാപകരും രക്ഷിതാക്കളും നാട്ടുകാരും ഒരുമിച്ചുചേര്ന്ന ഈ വേദി സ്നേഹത്തിന്റെയും സൗഹൃദത്തിന്റെയും സാക്ഷിയായി. സ്കൂളിലെ കുട്ടികളുടെ പ്രാര്ത്ഥനയോടെ ആരംഭിച്ച പരിപാടിയില് സീനിയര് ടീച്ചര് ശ്രീലത ടീച്ചര് ഹൃദയം നിറഞ്ഞ സ്വാഗതപ്രസംഗം നടത്തി. പി.ടി.എ പ്രസിഡന്റ് ഹാരിസ് കമ്പാര് അധ്യക്ഷത വഹിച്ച ചടങ്ങ് മോഗ്രാല് പുത്തൂര് ഗ്രാമപഞ്ചായത്ത് പ്രസിഡന്റ് കെ.എ. അബ്ദുള്ള കുഞ്ഞി ഉദ്ഘാടനം ചെയ്തു.
ജീവിതം മുഴുവന് വിദ്യാഭ്യാസത്തിന് സമര്പ്പിച്ച അമ്മു മാസ്റ്ററുടെ വിടവാങ്ങല് ചടങ്ങിന്റെ ഏറ്റവും ഹൃദയസ്പര്ശിയായ നിമിഷമായി മാറി. ഓരോ വാക്കിലും സ്നേഹവും ആദരവും നിറഞ്ഞൊഴുകി; ഓര്മ്മകളുടെ നനുത്ത തിരമാലകള് ഹൃദയങ്ങളെ സ്പര്ശിച്ചു.
കാസര്ഗോഡ് സൈബര് എസ്.ഐ രവീന്ദ്രന് സാര് നടത്തിയ അവബോധ ക്ലാസ് പരിപാടിക്ക് പുതുമയേകി. പഞ്ചായത്ത് വൈസ് പ്രസിഡന്റ് അര്ഫാന നജീബ്, പഞ്ചായത്ത് ആരോഗ്യ-വിദ്യാഭ്യാസ സ്റ്റാന്ഡിങ് കമ്മിറ്റി ചെയര്പേഴ്സണ് ഫൗസിയ സൈനുദ്ദീന്, നാലാം വാര്ഡ് മെമ്പര് അസ്മിന ഷാഫി, മൂന്നാം വാര്ഡ് മെമ്പര് അമീര് മഠം എന്നിവര് ആശംസകള് നേര്ന്നു.വിദ്യാലയത്തിന്റെ ഒരു വര്ഷത്തെ മികവുകള് രേഖപ്പെടുത്തിയ ലോഗ്ബുക്ക് CRC കോര്ഡിനേറ്റര് ഷാഹിദ് മാസ്റ്റര് അവതരിപ്പിച്ചു. തുടര്ന്ന് വിദ്യാലയത്തിലെ സീനിയര് അധ്യാപകരായ വിദ്യ ടീച്ചര്, അബ്ദുറഹിമാന് മാഷ് എന്നിവര് ആശംസകള് അര്പ്പിച്ചു.
സ്കൂളിലെ SRG കണ്വീനര് സമീറ ടീച്ചര് നന്ദി രേഖപ്പെടുത്തിയതോടെ ഉദ്ഘാടനചടങ്ങുകള് സമാപിച്ചു. തുടര്ന്ന് വിദ്യാര്ത്ഥികളുടെ വര്ണാഭമായ കലാപരിപാടികള് അരങ്ങേറി.
Leave a Reply