കാസർകോട്ട് വരും ദിവസങ്ങളിൽ അതിശക്തമായ മഴ; വെള്ളിയാഴ്ച മുതൽ ഓറഞ്ച് അലേർട്ട്

കാസർകോട്: സംസ്ഥാനത്ത് മഴ മുന്നറിയിപ്പുകൾ മാറിമറിയുന്ന പശ്ചാത്തലത്തിൽ വരും ദിവസങ്ങളിൽ കാസർകോട് ജില്ലയിൽ മഴ അതിശക്തമാകുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. നിലവിൽ ജില്ലയിൽ യെല്ലോ അലേർട്ട് തുടരുകയാണെങ്കിലും വെള്ളിയാഴ്ച (ജൂൺ 5) മുതൽ തുടർച്ചയായ നാല് ദിവസങ്ങളിൽ ജില്ലയിൽ ഓറഞ്ച് അലേർട്ട് പ്രഖ്യാപിച്ചിട്ടുണ്ട്.

ജൂൺ 5 വെള്ളിയാഴ്ച മുതൽ ജൂൺ 8 തിങ്കളാഴ്ച വരെ ജില്ലയിൽ പരക്കെ അതിശക്തമായ മഴയ്ക്കുള്ള സാധ്യതയുള്ളതിനാൽ പൊതുജനങ്ങളും അധികൃതരും അതീവ ജാഗ്രത പാലിക്കണമെന്ന് നിർദേശമുണ്ട്.

കാസർകോട്ടെ വരും ദിവസങ്ങളിലെ അലേർട്ട് വിവരങ്ങൾ:

ജൂൺ 4 (വ്യാഴം): യെല്ലോ അലേർട്ട് (ശക്തമായ മഴ)
ജൂൺ 5 (വെള്ളി): ഓറഞ്ച് അലേർട്ട് (അതിശക്തമായ മഴ)
ജൂൺ 6 (ശനി): ഓറഞ്ച് അലേർട്ട് (അതിശക്തമായ മഴ)
ജൂൺ 7 (ഞായർ): ഓറഞ്ച് അലേർട്ട് (അതിശക്തമായ മഴ)
ജൂൺ 8 (തിങ്കൾ): ഓറഞ്ച് അലേർട്ട് (അതിശക്തമായ മഴ)

സംസ്ഥാനത്ത് മുന്നറിയിപ്പുകളിൽ വൻ മാറ്റം

തിരുവനന്തപുരം, കൊല്ലം ജില്ലകളിൽ നിലവിലുണ്ടായിരുന്ന യെല്ലോ അലേർട്ട് മാറ്റി ഓറഞ്ച് അലേർട്ട് പ്രഖ്യാപിച്ചതോടെ സംസ്ഥാനത്ത് മഴ മുന്നറിയിപ്പുകളിൽ വീണ്ടും മാറ്റം വന്നിട്ടുണ്ട്. നിലവിൽ തിരുവനന്തപുരം, കൊല്ലം ജില്ലകൾക്ക് പുറമേ ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂര്‍ ജില്ലകളിലും ഓറഞ്ച് അലേർട്ടാണ്. കാസർകോട് ഉൾപ്പെടെയുള്ള മറ്റ് വടക്കൻ ജില്ലകളിൽ നിലവിൽ യെല്ലോ അലേർട്ട് തുടരുകയാണ്.

എന്നാൽ വരും ദിവസങ്ങളിൽ മഴ വടക്കൻ കേരളത്തിലേക്ക് ശക്തമായി കേന്ദ്രീകരിക്കുമെന്നാണ് പ്രവചനം. ശനിയാഴ്ച സംസ്ഥാനത്തെ 12 ജില്ലകളിലും ഞായറാഴ്ച 7 ജില്ലകളിലും തിങ്കളാഴ്ച കാസർകോട് ഉൾപ്പെടെ 4 വടക്കൻ ജില്ലകളിലും ഓറഞ്ച് അലേർട്ട് പ്രഖ്യാപിച്ചിട്ടുണ്ട്.

പൊതുജനങ്ങൾ ശ്രദ്ധിക്കാൻ: അതിശക്തമായ മഴ പെയ്യുന്ന സാഹചര്യത്തിൽ താഴ്ന്ന പ്രദേശങ്ങളിൽ വെള്ളപ്പൊക്കത്തിനും മലയോര മേഖലകളിൽ ഉരുൾപൊട്ടലിനും സാധ്യതയുണ്ട്. നദികളിലും ജലാശയങ്ങളിലും ഒഴുക്ക് വർധിക്കാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണം.