കാസർകോട്: മഴ തകർത്തു പെയ്തതോടെ ലഭിച്ച നാല് ദിവസത്തെ അവധിയൊക്കെ ആഘോഷിച്ച് വീട്ടിലിരുന്ന കുട്ടികളോട് “ഇനി അലസത മാറ്റിവെച്ച് നാളെ മുതൽ സ്കൂളുകളിലേക്ക് തിരിച്ചു പോകാൻ തയ്യാറെടുത്തോളൂ” എന്ന് ഓർമ്മിപ്പിക്കുകയാണ് കാസർകോട് ജില്ലാ കളക്ടർ അർജുൻ പാണ്ഡ്യൻ. വേറിട്ടൊരു സ്നേഹക്കുറിപ്പിലൂടെയാണ് നാളെ (ഓഗസ്റ്റ് 6) മുതൽ സ്കൂളുകൾ പുനരാരംഭിക്കുന്ന കാര്യം കളക്ടർ വിദ്യാർത്ഥികളെ അറിയിച്ചത്.
മഴ തുടരുന്നുണ്ടെങ്കിലും നിലവിൽ തീവ്രമഴ മുന്നറിയിപ്പുകൾ ഒന്നും ഇല്ലാത്തതിനാലാണ് ക്ലാസുകൾ വീണ്ടും ആരംഭിക്കുന്നത്. അവധി ദിനങ്ങൾ ഫലപ്രദമായി ഉപയോഗിച്ചു എന്ന് വിശ്വസിക്കുന്നതായും, ഇനി പഠനത്തിലേക്ക് ശ്രദ്ധ കേന്ദ്രീകരിക്കാമെന്നും സന്ദേശത്തിൽ പറയുന്നു.
സന്ദേശത്തിലെ പ്രധാന വിവരങ്ങൾ:
- പരീക്ഷകളും മേളകളും വരുന്നു: ഓണപ്പരീക്ഷകൾ അടുത്തെത്തിക്കഴിഞ്ഞു! കൂടാതെ ഓണാഘോഷം, കലോത്സവം, സ്പോർട്സ് മീറ്റ്, സയൻസ് ഫെസ്റ്റ് തുടങ്ങി നിരവധി പരിപാടികളാണ് കുട്ടികളെ കാത്തിരിക്കുന്നത്.
- സുരക്ഷാ ജാഗ്രത: കാലവർഷം തുടരുന്നതിനാൽ ജില്ലാ ഭരണകൂടം നൽകുന്ന സുരക്ഷാ മുന്നറിയിപ്പുകൾ കൃത്യമായി പാലിക്കാനും നിർദ്ദേശമുണ്ട്.
- സ്കൂളുകൾ സജ്ജമാക്കാൻ നിർദ്ദേശം: കുട്ടികൾ എത്തുന്നതിന് മുന്നോടിയായി സ്കൂളുകളും പരിസരവും വൃത്തിയാക്കാനും സുരക്ഷ ഉറപ്പാക്കാനും സ്കൂൾ അധികൃതർക്ക് കൃത്യമായ നിർദ്ദേശം നൽകിയിട്ടുണ്ട്.
“എല്ലാ കൂട്ടുകാരെയും വീണ്ടും സ്കൂളുകളിലേക്ക് സ്വാഗതം ചെയ്യുന്നു…” എന്ന ആശംസയോടെയാണ് കളക്ടറുടെ കുറിപ്പ് അവസാനിക്കുന്നത്.
Leave a Reply