തിരുവനന്തപുരം: സംസ്ഥാനത്ത് റോഡപകട മരണങ്ങൾ കുറയ്ക്കുകയെന്ന ലക്ഷ്യത്തോടെ രൂപീകരിച്ച ‘കേരള സ്റ്റേറ്റ് റോഡ് സേഫ്റ്റി മിഷന്റെ’ ഗുഡ്‌വിൽ അംബാസഡറായി നടൻ മമ്മൂട്ടിയെ നിയമിക്കുമെന്ന് ഗതാഗത മന്ത്രി സി.പി. ജോൺ അറിയിച്ചു. മുഖ്യമന്ത്രിയുടെ അധ്യക്ഷതയിൽ രൂപീകരിച്ച മിഷന്റെ ഔദ്യോഗിക പ്രഖ്യാപനം നവംബർ 15-ന് രാവിലെ 11-ന് എറണാകുളം ടൗൺഹാളിൽ നടക്കും.
പ്രതിവർഷം ശരാശരി 3,600 ജീവനുകളാണ് കേരളത്തിൽ റോഡപകടങ്ങളിൽ പൊലിയുന്നത്. മമ്മൂട്ടിയുടെ നേതൃത്വത്തിലുള്ള വിപുലമായ ജനകീയ ബോധവത്കരണത്തിലൂടെയും കർശന നിയമനടപടികളിലൂടെയും ഈ മരണനിരക്ക് ഘട്ടംഘട്ടമായി കുറയ്ക്കാനാണ് സർക്കാർ ലക്ഷ്യമിടുന്നത്. ഒന്നാം ക്ലാസ് വിദ്യാർഥികൾ മുതൽ മുതിർന്ന പൗരന്മാർ വരെയുള്ളവരിലേക്ക് സുരക്ഷിത യാത്രാസംസ്കാരം വ്യാപിപ്പിക്കും. ഗുരുതരമായ നിയമലംഘനങ്ങൾ നടത്തുന്നവർക്കെതിരെ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്നും മന്ത്രി വ്യക്തമാക്കി.
മിഷന്റെ ഭാഗമായി ജില്ലാ, പ്രാദേശിക തലങ്ങളിൽ സേഫ് ഡ്രൈവിങ് ക്ലബ്ബുകൾ രൂപീകരിക്കും. റോഡുകളുടെ ശാസ്ത്രീയ നവീകരണം, ബ്ലാക്ക് സ്പോട്ടുകൾ ഒഴിവാക്കൽ, സൈൻ ബോർഡുകളുടെ അറ്റകുറ്റപ്പണി, സീബ്രാ ലൈനുകളുടെ വീതി കൂട്ടൽ, റോഡ് മാർക്കിങ്ങുകളിൽ കളർ കോഡുകൾ ഏർപ്പെടുത്തൽ തുടങ്ങിയ അടിസ്ഥാന സൗകര്യ വികസനങ്ങളും നടപ്പാക്കും. കൂടാതെ, സ്കൂൾ പാഠ്യപദ്ധതിയിൽ റോഡ് സുരക്ഷ ഉൾപ്പെടുത്തുന്നതിനും ഡിജിറ്റൽ ബോധവത്കരണത്തിനായി പ്രത്യേക മൊബൈൽ ആപ്പുകൾ വികസിപ്പിക്കുന്നതിനും നടപടികൾ പുരോഗമിക്കുകയാണ്.
Leave a Reply