കൊച്ചി: സംസ്ഥാനത്ത് വലിയ രാഷ്ട്രീയ കോളിളക്കം സൃഷ്ടിച്ച നയതന്ത്ര ചാനൽ സ്വർണക്കടത്ത് കേസിലെ പ്രധാന പ്രതി സ്വപ്ന സുരേഷ് വിവാഹിതയായി. കേസിലെ മറ്റൊരു പ്രതിയായ പി.എസ്. സരിത്താണ് വരൻ. കൊച്ചി നെട്ടൂർ വടക്കേ പാട്ടുപുരയ്ക്കൽ ക്ഷേത്രത്തിൽ വെച്ചായിരുന്നു വിവാഹച്ചടങ്ങുകൾ. അടുത്ത ബന്ധുക്കളും സുഹൃത്തുക്കളും മാത്രമാണ് ചടങ്ങിൽ പങ്കെടുത്തത്.
താൻ വിവാഹിതയായ വിവരം സ്വപ്ന തന്നെയാണ് സമൂഹമാധ്യമങ്ങളിലൂടെ ചിത്രങ്ങൾ സഹിതം പങ്കുവെച്ചത്. പുതിയ ജീവിതത്തിനായി എല്ലാവരുടെയും പ്രാർഥനയും അനുഗ്രഹവും വേണമെന്നും അവർ കുറിച്ചു.
“ഒരുമിച്ച് ജീവിക്കാൻ മാത്രമല്ല ഞങ്ങൾ വിവാഹജീവിതം തിരഞ്ഞെടുത്തത്. ഞങ്ങളുടെ കുട്ടികൾക്ക് സത്യവും ബഹുമാനവും മൂല്യങ്ങളും പഠിക്കാനാകുന്ന ഒരു അന്തരീക്ഷം സൃഷ്ടിക്കാനും, ഒരുമിച്ച് ഒരു ജീവിതം പടുത്തുയർത്താനുമാണ്. മരണം വരെ ഞാൻ സുമംഗലി ആയിരിക്കാൻ പ്രാർഥിക്കണം.”
— സ്വപ്ന സുരേഷ് കുറിച്ചു
തിരുവനന്തപുരം തൈക്കാട് സ്വദേശിയായ സ്വപ്നയും തിരുവല്ലം സ്വദേശിയായ സരിത്തും കുറച്ചുകാലമായി കൊച്ചിയിലാണ് ഒരുമിച്ച് താമസിക്കുന്നത്.
സ്വപ്നയുടെ മൂന്നാം വിവാഹമാണിത്. 2000-ൽ പ്ലസ് ടു പഠനകാലത്തായിരുന്നു കൃഷ്ണകുമാറുമായുള്ള ആദ്യ വിവാഹം. ഈ ബന്ധം 2008-ൽ വേർപിരിഞ്ഞു. തുടർന്ന് 2011-ൽ ജയശങ്കറിനെ വിവാഹം കഴിച്ചെങ്കിലും പിന്നീട് ആ ബന്ധവും അവസാനിക്കുകയായിരുന്നു. സരിത്തിന്റെ രണ്ടാം വിവാഹമാണിത്.
Leave a Reply