കാസർകോട്: ജനന സർട്ടിഫിക്കറ്റ് ലഭിക്കുന്നതിലെ കാലതാമസവും സങ്കീർണ്ണമായ നടപടിക്രമങ്ങളും മൂലം പ്രവാസികൾ ഉൾപ്പെടെയുള്ള സാധാരണക്കാർ അനുഭവിക്കുന്ന ദുരിതങ്ങൾക്ക് അടിയന്തര പരിഹാരം കാണണമെന്ന് ആവശ്യപ്പെട്ട് ദുബായ് കെ.എം.സി.സി കാസർകോട് മണ്ഡലം കമ്മിറ്റി മുഖ്യമന്ത്രി വി.ഡി. സതീശന് നിവേദനം സമർപ്പിച്ചു. സെക്രട്ടേറിയറ്റിൽ നേരിട്ടെത്തിയാണ് ഭാരവാഹികൾ മുഖ്യമന്ത്രിക്ക് നിവേദനം കൈമാറിയത്.
കാസർകോട് നിയോജക മണ്ഡലം എം.എൽ.എ കല്ലട്ര മഹിൻ, ദുബായ് കെ.എം.സി.സി കാസർകോട് മണ്ഡലം ജനറൽ സെക്രട്ടറി ഹസ്ക്കർ ചൂരി, വൈസ് പ്രസിഡന്റ് സുഹൈൽ കോപ്പ, സെക്രട്ടറി സഫ്വാൻ അണങ്കൂർ, ദുബായ് കെ.എം.സി.സി കാസർകോട് മുനിസിപ്പൽ ജനറൽ സെക്രട്ടറി സർഫ്രാസ് പട്ടേൽ എന്നിവരടങ്ങിയ സംഘമാണ് മുഖ്യമന്ത്രിയെ കണ്ട് വിഷയത്തിൽ അടിയന്തര സർക്കാർ ഇടപെടൽ ആവശ്യപ്പെട്ടത്.
സങ്കീർണ്ണമായ നിലവിലെ വ്യവസ്ഥിതി
വൈകിയുള്ള ജനന രജിസ്ട്രേഷനുമായി ബന്ധപ്പെട്ട നടപടിക്രമങ്ങളാണ് പ്രവാസികളെയും പൊതുജനങ്ങളെയും വലിയ പ്രതിസന്ധിയിലാക്കുന്നത്. നിലവിലെ ചട്ടപ്രകാരം 60 ദിവസത്തിന് ശേഷം ജനനം രജിസ്റ്റർ ചെയ്യുന്നതിന് തദ്ദേശസ്വയംഭരണ സ്ഥാപനത്തിൽ നിന്ന് നോൺ-അവൈലബിലിറ്റി സർട്ടിഫിക്കറ്റ് (NAC) വാങ്ങി ആർ.ഡി.ഒ (RDO) മുമ്പാകെ അപേക്ഷ സമർപ്പിക്കണം. തുടർന്ന് തഹസിൽദാർ, വില്ലേജ് ഓഫീസ് തുടങ്ങിയ വിവിധ തലങ്ങളിലേക്ക് ഫയൽ കൈമാറി അന്വേഷണ റിപ്പോർട്ട് ശേഖരിച്ച ശേഷമാണ് ആർ.ഡി.ഒ അനുമതി നൽകുന്നത്. ഇതിനുശേഷമാണ് തദ്ദേശസ്ഥാപനത്തിൽ രജിസ്ട്രേഷൻ പൂർത്തിയാക്കി സർട്ടിഫിക്കറ്റ് നൽകുന്നത്.
മാനുവലായി വിവിധ സർക്കാർ ഓഫീസുകൾക്കിടയിൽ ഫയലുകൾ നീങ്ങുന്ന ഈ രീതി മാസങ്ങളുടെ കാലതാമസത്തിന് ഇടയാക്കുന്നു. അപേക്ഷകർക്ക് പലതവണ ഓഫീസുകൾ കയറിയിറങ്ങേണ്ട അവസ്ഥയാണുള്ളത്. പ്രത്യേകിച്ച് വിദേശത്ത് ജനിച്ച കുട്ടികളുടെ ജനനം നാട്ടിലെത്തി വൈകി രജിസ്റ്റർ ചെയ്യേണ്ടിവരുന്ന പ്രവാസി കുടുംബങ്ങൾക്ക് ഇത് വലിയ ദുരിതമാണ് സൃഷ്ടിക്കുന്നത്. രേഖകൾ ലഭിക്കാൻ വൈകുന്നത് കുട്ടികളുടെ സ്കൂൾ പ്രവേശനം, തിരിച്ചറിയൽ രേഖകൾ, പാസ്പോർട്ട് തുടങ്ങിയ അടിയന്തര ആവശ്യങ്ങളെയും സാരമായി ബാധിക്കുന്നുണ്ട്.
പ്രധാന ആവശ്യങ്ങൾ:
- ഏകീകൃത ഓൺലൈൻ സംവിധാനം: തദ്ദേശസ്വയംഭരണ സ്ഥാപനങ്ങൾ, ആർ.ഡി.ഒ, താലൂക്ക്, വില്ലേജ് ഓഫീസുകൾ എന്നിവയെ പരസ്പരം ബന്ധിപ്പിച്ചുകൊണ്ട് പൂർണ്ണമായും ഓൺലൈൻ അധിഷ്ഠിതമായ ഏകീകൃത പോർട്ടൽ സംവിധാനം നടപ്പിലാക്കുക.
- എംബസി സർട്ടിഫിക്കറ്റുകൾക്ക് അംഗീകാരം: വിദേശത്തെ ഇന്ത്യൻ എംബസികളിലും കോൺസുലേറ്റുകളിലും നിയമാനുസൃതമായി രജിസ്റ്റർ ചെയ്ത് ലഭിക്കുന്ന ജനന സർട്ടിഫിക്കറ്റുകൾ കേരളത്തിലെ എല്ലാ സർക്കാർ വകുപ്പുകളിലും ഔദ്യോഗിക രേഖയായി അംഗീകരിച്ച് ഉത്തരവിറക്കുക.
- അനാവശ്യ പരിശോധനകൾ ഒഴിവാക്കുക: പ്രവാസികൾക്ക് ഒരേ രേഖകൾ പല ഓഫീസുകളിലായി വീണ്ടും വീണ്ടും സമർപ്പിക്കേണ്ടി വരുന്ന പ്രവണത അവസാനിപ്പിച്ച് നടപടിക്രമങ്ങൾ സുതാര്യവും സമയബന്ധിതവുമാക്കുക.
നിയമപരിഷ്കാരങ്ങളുമായി ബന്ധപ്പെട്ട് നിലനിൽക്കുന്ന ആശയക്കുഴപ്പങ്ങൾ പരിഹരിച്ച്, ജനങ്ങൾക്ക് വേഗത്തിലും ലളിതമായും സേവനം ലഭ്യമാക്കാൻ സർക്കാർ തലത്തിൽ അടിയന്തര നടപടിയുണ്ടാകണമെന്ന് കെ.എം.സി.സി ആവശ്യപ്പെട്ടു.
Leave a Reply