കാസർകോട്: കുറ്റിക്കോൽ ഒറ്റമാവുങ്കാലിൽ നിർമാണം പൂർത്തിയായ വീടിനടിയിൽ വൻ ഗുഹ രൂപപ്പെട്ടതിനെ തുടർന്ന് പെരുവഴിയിലായ സദനും കുടുംബത്തിനും ആശ്വാസവുമായി കേന്ദ്രമന്ത്രി സുരേഷ് ഗോപി. കുടുംബത്തിന്റെ പുതിയ വീട് നിർമാണത്തിനായി ഒരു ലക്ഷം രൂപ സഹായം നൽകുമെന്ന് കേന്ദ്രമന്ത്രി അറിയിച്ചു. വർഷങ്ങളായുള്ള കാത്തിരിപ്പിനൊടുവിൽ ഏകദേശം 30 ലക്ഷം രൂപയോളം ചെലവഴിച്ച് പണിത വീട് വാസയോഗ്യമല്ലെന്ന റിപ്പോർട്ട് വന്നതോടെ പ്രതിസന്ധിയിലായ സദന്റെ ദുരവസ്ഥ ശ്രദ്ധയിൽപ്പെട്ടതിനെ തുടർന്നാണ് കേന്ദ്രമന്ത്രിയുടെ ഇടപെടൽ.
സ്വപ്നഭവനത്തിന് വില്ലനായത് ‘സോയിൽ പൈപ്പിങ്’
ഗൃഹപ്രവേശനത്തിന് ഒരുങ്ങുന്നതിനിടെയാണ് വീടിനടിയിൽ വലിയ തോതിൽ മണ്ണ് ഒലിച്ചുപോയി വൻ ഗുഹ രൂപപ്പെട്ടത് വീട്ടുകാരുടെ ശ്രദ്ധയിൽപ്പെട്ടത്. ജില്ലാ ഭരണകൂടത്തിന്റെ നിർദേശപ്രകാരം ജിയോളജി, സോയിൽ വിഭാഗങ്ങളിലെ ഉദ്യോഗസ്ഥരടങ്ങുന്ന വിദഗ്ധ സംഘം സ്ഥലത്തെത്തി നടത്തിയ പരിശോധനയിലാണ് ‘സോയിൽ പൈപ്പിങ്’ (Soil Piping) മൂലമാണ് ഗുഹ രൂപപ്പെട്ടതെന്ന് കണ്ടെത്തിയത്.
വീടിന് കടുത്ത സുരക്ഷാ ഭീഷണിയുള്ളതിനാൽ ഇവിടെ താമസിക്കുന്നത് അത്യന്തം അപകടകരമാണെന്ന് അധികൃതർ റിപ്പോർട്ട് നൽകി. ഇതോടെ ജീവിതസമ്പാദ്യം മുഴുവൻ മുടക്കി പണിതുയർത്തിയ വീട് ഉപേക്ഷിക്കേണ്ട ഗതികേടിലായി കുടുംബം. പുതിയൊരു വീട് വെക്കാനുള്ള സാമ്പത്തിക ശേഷിയില്ലെന്നും സുമനസ്സുകൾ സഹായിക്കണമെന്നും സദൻ അഭ്യർഥിച്ചിരുന്നു.
പുതിയ വീടിനായി നാട്ടുകൂട്ടം; ആറുമാസത്തിനകം പൂർത്തിയാക്കും
കുടുംബത്തെ സഹായിക്കാൻ നാട്ടുകാർ ചേർന്ന് വിപുലമായ ജനകീയ സമിതി രൂപീകരിച്ചു. കുറ്റിക്കോൽ പഞ്ചായത്ത് പ്രസിഡന്റ് കെ. ശോഭന കുമാരിയുടെ നേതൃത്വത്തിലാണ് സമിതിയുടെ പ്രവർത്തനം. സ്ഥലം വാങ്ങി പുതിയ വീട് നിർമിച്ചുനൽകാനാണ് സമിതിയുടെ തീരുമാനം. ഇതിനായി ആരെങ്കിലും ഭൂമി സൗജന്യമായി വിട്ടുനൽകിയാൽ സ്വീകരിക്കും. ആറുമാസത്തിനുള്ളിൽ നിർമാണം പൂർത്തിയാക്കുക എന്ന ലക്ഷ്യത്തോടെ അഞ്ചംഗ സമിതിയെയും പ്രവർത്തനങ്ങൾക്കായി ചുമതലപ്പെടുത്തിയിട്ടുണ്ട്.
നാട്ടുകാരുടെ നേതൃത്വത്തിലുള്ള കൂട്ടായ്മയ്ക്കൊപ്പം കേന്ദ്രമന്ത്രി സുരേഷ് ഗോപിയുടെ സഹായവാഗ്ദാനം കൂടി എത്തിയതോടെ, സദനും കുടുംബത്തിനും പുതിയൊരു കൂരയെന്ന സ്വപ്നം ഉടൻ യാഥാർഥ്യമാകുമെന്ന വലിയ പ്രതീക്ഷയിലാണ് നാട്.
Leave a Reply