കോട്ടയം: സോഷ്യൽ മീഡിയയിലൂടെ മലയാളികളുടെ മനംകവർന്ന ഇൻസ്റ്റഗ്രാം താരം അമ്മുക്കുട്ടി അമ്മൂമ്മ (106) അന്തരിച്ചു. കോട്ടയം അയ്മനം സ്വദേശിയാണ്. വാർധക്യസഹജമായ അസുഖങ്ങളെ തുടർന്ന് ചികിത്സയിലായിരുന്നു. ചെറുമകൾ ഗോപികയാണ് ഇൻസ്റ്റഗ്രാമിലൂടെ അമ്മൂമ്മയുടെ വിയോഗവാർത്ത പങ്കുവെച്ചത്.
സോഷ്യൽ മീഡിയയിലെ താരം
ചെറുമകൾ ഗോപികയുടെ ‘ഗോപികാസ് ഗ്യാലറീസ്’ (Gopika’s Galleries) എന്ന ഇൻസ്റ്റഗ്രാം പേജിലൂടെയാണ് അമ്മുക്കുട്ടി അമ്മൂമ്മ സൈബർ ലോകത്ത് ശ്രദ്ധേയയാകുന്നത്. 106-ാം വയസ്സിലും ഊർജ്ജസ്വലതയോടെ വീഡിയോകളിൽ പ്രത്യക്ഷപ്പെട്ടിരുന്ന അമ്മൂമ്മയ്ക്ക് വലിയൊരു ആരാധകവൃന്ദം തന്നെയുണ്ടായിരുന്നു. തന്റെ പേര് ‘സി.പി. അമ്മുക്കുട്ടിയമ്മ’ എന്ന് ഇംഗ്ലീഷിലും മലയാളത്തിലും അനായാസം എഴുതിക്കാണിക്കുന്ന അമ്മൂമ്മയുടെ വീഡിയോകൾ ലക്ഷക്കണക്കിന് ആളുകളാണ് കണ്ടത്.
മോഹൻലാലിന്റെ വലിയ ആരാധിക
നടൻ മോഹൻലാലിന്റെ കടുത്ത ആരാധിക കൂടിയായിരുന്നു അമ്മുക്കുട്ടി അമ്മൂമ്മ. ലാലേട്ടനെ നേരിൽ കാണണമെന്ന ആഗ്രഹം അമ്മൂമ്മ പല വീഡിയോകളിലൂടെയും പങ്കുവെച്ചിട്ടുണ്ട്. ഇത് ശ്രദ്ധയിൽപ്പെട്ട മോഹൻലാൽ അമ്മൂമ്മയ്ക്ക് പിറന്നാൾ ആശംസകൾ അറിയിച്ചുകൊണ്ട് വീഡിയോ സന്ദേശം അയച്ചിരുന്നു. കോട്ടയത്ത് അടുത്ത ചിത്രീകരണത്തിന് എത്തുമ്പോൾ നേരിൽ വന്ന് കാണാമെന്ന് അദ്ദേഹം അമ്മൂമ്മയ്ക്ക് ഉറപ്പും നൽകിയിരുന്നു.
പ്രായത്തെ തോൽപ്പിക്കുന്ന ചുറുചുറുക്കും നിഷ്കളങ്കമായ സംസാരശൈലിയും കൊണ്ട് കാഴ്ചക്കാരെ ചിരിപ്പിക്കുകയും ചിന്തിപ്പിക്കുകയും ചെയ്ത അമ്മുക്കുട്ടി അമ്മൂമ്മയുടെ വിയോഗത്തിൽ സോഷ്യൽ മീഡിയ ഒന്നടങ്കം ആദരാഞ്ജലികൾ അർപ്പിക്കുകയാണ്.
Leave a Reply