കാസർകോട്: പൗരത്വ ഭേദഗതി നിയമത്തിനും (CAA) ദേശീയ പൗരത്വ രജിസ്റ്ററിനുമെതിരെ (NRC) 2019-ൽ നടന്ന ഹർത്താലുമായി ബന്ധപ്പെട്ട കേസിൽ എസ്ഡിപിഐ ജില്ലാ നേതാക്കളെ കോടതി വെറുതെ വിട്ടു. കാസർകോട് ജൂഡിഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയുടേതാണ് വിധി. ഹർത്താലിനിടെ പൊലീസുകാരെ ആക്രമിച്ചുവെന്നും കൃത്യനിർവഹണം തടസ്സപ്പെടുത്തിയെന്നുമുള്ള കേസിലാണ് കോടതി നേതാക്കളെ കുറ്റവിമുക്തരാക്കിയത്.
এসഡിപിഐ മുൻ ജില്ലാ പ്രസിഡന്റ് എൻ യു അബ്ദുൽസലാം, ജില്ലാ ജനറൽ സെക്രട്ടറി ഖാദർ അറഫ, ഗ്രാമപഞ്ചായത്തംഗം ശമീർ ആസാദ് നഗർ, സഅദ് ഉളിയത്തടുക്ക, നാസർ കൊറകോട് എന്നിവരെയാണ് കോടതി വെറുതെ വിട്ടത്.
2019 ഡിസംബർ 17-നാണ് കേസിനാസ്പദമായ ഹർത്താൽ നടന്നത്. കേന്ദ്ര സർക്കാർ കൊണ്ടുവന്ന സിഎഎ, എൻആർസി നിയമങ്ങൾക്കെതിരെ എസ്ഡിപിഐയുടെ നേതൃത്വത്തിൽ കേരളത്തിൽ നടത്തിയ ഹർത്താലുമായി ബന്ധപ്പെട്ടാണ് കാസർകോട് ടൗൺ പൊലീസ് നേതാക്കൾക്കെതിരെ കേസെടുത്തിരുന്നത്. ഹർത്താൽ അനുകൂലികൾ പൊതുമുതൽ നശിപ്പിക്കാനും പൊലീസിനെ ആക്രമിക്കാനും മുതിർന്നു എന്നായിരുന്നു പ്രോസിക്യൂഷൻ വാദം.
എന്നാൽ വർഷങ്ങൾ നീണ്ട നിയമപോരാട്ടത്തിനൊടുവിൽ പ്രോസിക്യൂഷൻ ആരോപിച്ച കുറ്റങ്ങൾ തെളിയിക്കാനായില്ലെന്ന് വ്യക്തമാക്കിയാണ് കോടതി പ്രതികളെ വെറുതെ വിട്ടത്. പ്രതിഭാഗത്തിന് വേണ്ടി പ്രമുഖ അഭിഭാഷകരായ അഡ്വ. എ. അബ്ദുൽ റഹ്മാൻ, അഡ്വ. ഷബീർ അഹമ്മദ് എന്നിവർ കോടതിയിൽ ഹാജരായി.
Leave a Reply