കാഞ്ഞങ്ങാട്: രാജ്യത്തെ ഡിജിറ്റൽ സെൻസസ് നടപടികൾക്ക് ഹൊസ്ദുർഗ് താലൂക്കിൽ തുടക്കമായി. പ്രശസ്ത ശിൽപി കാനായി കുഞ്ഞിരാമൻ കാഞ്ഞങ്ങാട് അതിയാമ്പൂരിലെ വീട്ടിലിരുന്ന് മൊബൈൽ ഫോൺ വഴി സെൻസസ് പോർട്ടലിൽ വിവരങ്ങൾ നൽകിയാണ് താലൂക്കുതല ഉദ്ഘാടനം നിർവ്വഹിച്ചത്. വീട്, കുടിവെള്ളം, ശുചിത്വം, ആസ്തി എന്നിവയുമായി ബന്ധപ്പെട്ട 34 ചോദ്യങ്ങൾക്കാണ് അദ്ദേഹം ഡിജിറ്റലായി മറുപടി നൽകിയത്. കാനായിയുടെ ഭാര്യ നളിനി കാനായിയും ഈ സമയം ഒപ്പമുണ്ടായിരുന്നു.
സെൻസസ് ഓപറേഷൻ ഡയറക്ടറേറ്റിൽ നിന്നുള്ള ജില്ലാ കോർഡിനേറ്റർ രാജ്കുമാർ സ്വയം വിവരം രേഖപ്പെടുത്തുന്നതിനുള്ള സാങ്കേതിക പിന്തുണ നൽകി. ജില്ലാ ഇൻഫർമേഷൻ ഓഫീസർ എം. മധുസൂദനൻ, ഹൊസ്ദുർഗ് താലൂക്ക് ജൂനിയർ സൂപ്രണ്ട് പി.വി. തുളസിരാജ്, കളക്ട്രേറ്റ് സെൻസസ് വിഭാഗത്തിലെ പി. രാഗേഷ്, രാജേഷ് അതിയാമ്പൂർ എന്നിവരും കാനായി കുഞ്ഞിരാമന്റെ വസതിയിൽ എത്തിയിരുന്നു.
എന്താണ് ‘സെൽഫ് എന്യൂമറേഷൻ’?
മുൻകാലങ്ങളിൽ നിന്ന് വ്യത്യസ്തമായി ഡിജിറ്റൽ സംവിധാനങ്ങൾ പൂർണ്ണമായി പ്രയോജനപ്പെടുത്തിക്കൊണ്ട് പൊതുജനങ്ങൾക്ക് നേരിട്ട് പങ്കാളികളാകാൻ സാധിക്കുന്ന ‘സെൽഫ് എന്യൂമറേഷൻ’ പോർട്ടൽ ഈ സെൻസസിന്റെ പ്രധാന സവിശേഷതയാണ്. സെൻസസ് ഉദ്യോഗസ്ഥരുടെ സഹായമില്ലാതെ തന്നെ പൊതുജനങ്ങൾക്ക് തങ്ങളുടെ വിവരങ്ങൾ സ്വന്തമായി ഡിജിറ്റൽ പോർട്ടൽ വഴി രേഖപ്പെടുത്താൻ ഇതിലൂടെ സാധിക്കും.
- പോർട്ടൽ ലിങ്ക്: https://se.census.gov.in/
- സമയപരിധി: ജൂൺ 16 മുതൽ ജൂൺ 30 വരെ.
- ടോൾ ഫ്രീ നമ്പർ: സംശയങ്ങൾക്കും സഹായങ്ങൾക്കുമായി 1855 എന്ന നമ്പറിൽ ബന്ധപ്പെടാം.
‘നമ്മുടെ സെൻസസ്, നമ്മുടെ വികസനം’ എന്ന സന്ദേശവുമായാണ് ഇത്തവണത്തെ സെൻസസ് ക്യാമ്പയിൻ മുന്നോട്ട് പോകുന്നത്. ‘ജനഗണന സേ ജൻ കല്യാൺ’ (ജനസംഖ്യാ കണക്കെടുപ്പിലൂടെ ജനക്ഷേമം) എന്ന ഔദ്യോഗിക ലോഗോയിലെ വചനം സൂചിപ്പിക്കുന്നത് പോലെ ജനങ്ങളുടെ ക്ഷേമമാണ് ഇതിലൂടെ ലക്ഷ്യമിടുന്നത്.
സെൻസസ് നടപടികൾ രണ്ട് ഘട്ടങ്ങളായി:
- ഒന്നാം ഘട്ടം (സെൽഫ് എന്യൂമറേഷൻ): പൊതുജനങ്ങൾക്ക് സ്വയം വിവരങ്ങൾ രേഖപ്പെടുത്താം. ജൂൺ 16 മുതൽ ജൂൺ 30 വരെയാണ് ഇതിനുള്ള സമയം.
- രണ്ടാം ഘട്ടം: ജൂലൈ 1 മുതൽ ജൂലൈ 30 വരെ വീടുകളുടെ വിവരശേഖരണവും പട്ടിക തയ്യാറാക്കലും നടക്കും.
തുടർന്ന് 2027 ഫെബ്രുവരിയിലായിരിക്കും അന്തിമ ജനസംഖ്യാ കണക്കെടുപ്പ് നടക്കുക.
Leave a Reply