കാസർകോട്: ദേശീയപാത വികസനവുമായി ബന്ധപ്പെട്ട് പെരിയ ചാലിങ്കാലിൽ സ്ഥാപിക്കുന്ന നിർദിഷ്ട ടോൾ പ്ലാസയ്ക്കെതിരെ പ്രദേശവാസികളുടെ ശക്തമായ പ്രതിഷേധം. മുൻപ് അധികൃതർ നൽകിയ ഉറപ്പുകൾ പാലിക്കാതെ ടോൾ പ്ലാസ തുറക്കാനുള്ള നീക്കത്തിനെതിരെ കക്ഷിരാഷ്ട്രീയത്തിനതീതമായാണ് നാട്ടുകാർ ഒറ്റക്കെട്ടായി രംഗത്തിറങ്ങിയത്. സർവീസ് റോഡുകൾ പൂർത്തിയാക്കാത്തതും കുന്നുമ്മങ്ങാനം റോഡിൽ രൂപപ്പെടുന്ന രൂക്ഷമായ വെള്ളക്കെട്ടുമാണ് ജനങ്ങളെ പ്രതിഷേധത്തിലേക്ക് നയിച്ചത്.
വെള്ളിയാഴ്ച രാവിലെ പത്തുമണിയോടെ നാട്ടുകാർ സംഘടിച്ച് ചാലിങ്കാലിലെ ടോൾ പ്ലാസയ്ക്ക് മുന്നിലെത്തി നിർമാണ പ്രവർത്തനങ്ങൾ തടസ്സപ്പെടുത്തുന്ന രീതിയിലേക്ക് പ്രതിഷേധം ഉയർത്തി.
എണ്ണപ്പാറയിലെ കുടുംബങ്ങൾ ഒറ്റപ്പെടുന്നു
ടോൾ പ്ലാസയും അനുബന്ധ സൗകര്യങ്ങളും വരുന്നതോടെ ചാലിങ്കാലിന്റെ ഉൾപ്രദേശമായ എണ്ണപ്പാറയിലെ കുടുംബങ്ങൾ പൂർണമായും ഒറ്റപ്പെട്ട നിലയിലാകും. നിലവിൽ ഇവിടേക്കുള്ള ഗതാഗത സൗകര്യം പൂർണമായി നിലച്ച മട്ടാണ്. ഈ കുടുംബങ്ങൾക്ക് അടിയന്തരമായി വഴിയൊരുക്കണമെന്ന ആവശ്യമാണ് നാട്ടുകാർ പ്രധാനമായും ഉന്നയിക്കുന്നത്.
നാട്ടുകാർ സംഘടിച്ച വിവരമറിഞ്ഞ് അമ്പലത്തറ പോലീസ് സ്ഥലത്തെത്തി. സമാധാനപരമായ രീതിയിലാണ് തങ്ങളുടെ പ്രതിഷേധമെന്ന് നാട്ടുകാർ പോലീസിനെ അറിയിച്ചു. തുടർന്ന് കരാർ കമ്പനിയായ മേഘ കൺസ്ട്രക്ഷൻസിന്റെ പ്രതിനിധികളും സ്ഥലത്തെത്തി. എണ്ണപ്പാറയിലെ കുടുംബങ്ങളുടെ യാത്രാ പ്രശ്നവും പ്രദേശത്തെ വെള്ളക്കെട്ടും നാട്ടുകാർ ഉദ്യോഗസ്ഥരെ നേരിൽ കണ്ട് ബോധ്യപ്പെടുത്തി.
തത്കാലം നിർമാണം നടത്തില്ലെന്ന് കമ്പനി
നിലവിൽ ടോൾ പ്ലാസയുടെ നിർമാണം പൂർണമായി നിർത്തിവെക്കാൻ കഴിയില്ലെന്ന് വ്യക്തമാക്കിയ മേഘ കൺസ്ട്രക്ഷൻസ് പ്രതിനിധികൾ, പ്രദേശത്തെ പ്രശ്നങ്ങൾ എൻ.എച്ച്.എ.ഐ (NHAI) പ്രോജക്ട് മാനേജറുടെ ശ്രദ്ധയിൽപ്പെടുത്താമെന്ന് പോലീസിനും നാട്ടുകാർക്കും ഉറപ്പുനൽകി. കൂടാതെ, എണ്ണപ്പാറയിലെ കുടുംബങ്ങൾക്ക് ടോൾ പ്ലാസയുടെ വടക്കുഭാഗത്ത് റോഡൊരുക്കുന്നതിനായി, അവിടെയുള്ള ആറുമീറ്റർ ഭാഗത്ത് തത്കാലം നിർമാണപ്രവർത്തനങ്ങൾ നടത്തില്ലെന്നും കമ്പനി അധികൃതർ സമ്മതിച്ചിട്ടുണ്ട്.
കർമസമിതി രൂപീകരിക്കുമെന്ന് പഞ്ചായത്ത് പ്രസിഡന്റ്
പുല്ലൂർ-പെരിയ പഞ്ചായത്തിലെ വിവിധയിടങ്ങളിൽ ഇനിയും സർവീസ് റോഡുകളുടെ നിർമാണം പൂർത്തിയാകാനുണ്ടെന്ന് പഞ്ചായത്ത് പ്രസിഡന്റ് ഡോ. സി.കെ. സബിത പറഞ്ഞു. യാത്രക്കാർക്ക് സുഖകരമായ യാത്രാസൗകര്യം ഒരുക്കാതെ ടോൾ പ്ലാസ തുറക്കാനുള്ള നീക്കം ഒരു കാരണവശാലും അംഗീകരിക്കാൻ കഴിയില്ലെന്നും, പ്രശ്നത്തിൽ അടിയന്തരമായി ഇടപെടാൻ ഭരണസമിതിയുമായി ആലോചിച്ച് പഞ്ചായത്തിന്റെ നേതൃത്വത്തിൽ ഒരു ജനകീയ കർമസമിതി രൂപീകരിക്കുമെന്നും പ്രസിഡന്റ് വ്യക്തമാക്കി.
Leave a Reply