കാസർകോട്: ജില്ലയിൽ മഴക്കാലത്തിന് മുന്നോടിയായുള്ള ദുരന്തനിവാരണ മുന്നൊരുക്ക പ്രവർത്തനങ്ങൾ വിലയിരുത്തുന്നതിനായി തദ്ദേശസ്വയംഭരണ വകുപ്പിന്റെ നേതൃത്വത്തിൽ പ്രത്യേക അവലോകനയോഗം ചേർന്നു. മേയ് 22-നായിരുന്നു യോഗം സംഘടിപ്പിച്ചത്.
ജില്ലാ പഞ്ചായത്ത് പ്രസിഡന്റ് സാബു എബ്രഹാം യോഗത്തിൽ അധ്യക്ഷത വഹിച്ചു. കാലവർഷം എത്തുന്നതിന് മുൻപായി ജില്ലയിലെ എല്ലാ തദ്ദേശസ്വയംഭരണ പരിധിയിലും ആവശ്യമായ മുൻകരുതലുകളും ദുരന്തനിവാരണ പ്രവർത്തനങ്ങളും സമയബന്ധിതമായി പൂർത്തിയാക്കേണ്ടതിന്റെ ആവശ്യകത അദ്ദേഹം ചൂണ്ടിക്കാട്ടി.
ജില്ലാ കളക്ടർ അർജുൻ പാണ്ഡ്യൻ, ശുചിത്വമിഷൻ ജില്ലാ കോഡിനേറ്റർ പി. ജയൻ എന്നിവർ യോഗത്തിൽ പങ്കെടുത്തു സംസാരിക്കുകയും ആവശ്യമായ നിർദ്ദേശങ്ങൾ നൽകുകയും ചെയ്തു. വിവിധ തദ്ദേശ സ്വയംഭരണ സ്ഥാപനങ്ങളിലെ അധ്യക്ഷന്മാർ, സെക്രട്ടറിമാർ, തദ്ദേശ സ്വയംഭരണ വകുപ്പിലെ എക്സിക്യൂട്ടീവ് എൻജിനീയർമാർ, അസിസ്റ്റന്റ് എക്സിക്യൂട്ടീവ് എൻജിനീയർമാർ, അസിസ്റ്റന്റ് എൻജിനീയർമാർ തുടങ്ങിയ ഉദ്യോഗസ്ഥരും യോഗത്തിന്റെ ഭാഗമായി.
തദ്ദേശസ്വയംഭരണ വകുപ്പ് ജോയിന്റ് ഡയറക്ടർ ജയ്സൺ മാത്യു യോഗത്തിൽ സ്വാഗതം ആശംസിച്ചു. ഡെപ്യൂട്ടി ഡയറക്ടർ കെ. വി. ഹരിദാസ് നന്ദി രേഖപ്പെടുത്തി. മഴക്കാലത്ത് ഉണ്ടായേക്കാവുന്ന അടിയന്തര സാഹചര്യങ്ങളെ നേരിടാൻ എല്ലാ വകുപ്പുകളും ഏകോപനത്തോടെ ഒത്തുപ്രവർത്തിക്കുമെന്ന് യോഗം വിലയിരുത്തി.
Leave a Reply