ചെർക്കള: ചെങ്കള ഗ്രാമപഞ്ചായത്ത് കുടുംബശ്രീ സി.ഡി.എസിന്റെ (CDS) ആഭിമുഖ്യത്തിൽ സംഘടിപ്പിച്ച ബാലസഭ ‘കളിക്കൂട്ടം’ ഫെസ്റ്റീവ ദ്വിദിന ക്യാമ്പ് സമാപിച്ചു. കുട്ടികളുടെ സർഗ്ഗാത്മക ശേഷിയും കായികക്ഷമതയും വളർത്തുക എന്ന ലക്ഷ്യത്തോടെയാണ് ക്യാമ്പ് സംഘടിപ്പിച്ചത്. ചെങ്കള ഗ്രാമപഞ്ചായത്തിലെ വിവിധ വാർഡുകളിൽ നിന്നായി 117 കുട്ടികളാണ് ഈ രണ്ടു ദിവസത്തെ പരിശീലന പരിപാടിയിൽ പങ്കെടുത്തത്.
സി.ഡി.എസ് ചെയർപേഴ്സൺ സകീന സി.എ അധ്യക്ഷത വഹിച്ച ചടങ്ങിൽ ചെങ്കള ഗ്രാമപഞ്ചായത്ത് പ്രസിഡന്റ് വസന്തൻ അജക്കോട് ക്യാമ്പിന്റെ ഔദ്യോഗിക ഉദ്ഘാടനം നിർവ്വഹിച്ചു.
ക്യാമ്പിന്റെ ഭാഗമായി വിവിധ മേഖലകളിൽ മികച്ച വിജയം കൈവരിച്ച ബാലസഭയിലെ പ്രതിഭകളെ ആദരിച്ചു. സംസ്ഥാന കലോത്സവത്തിൽ പങ്കെടുത്തവർ, സംസ്ഥാനതല തൈക്വണ്ടോ ചാമ്പ്യൻഷിപ്പിൽ സ്വർണ്ണ മെഡൽ നേടിയ മിടുക്കർ, 2025-26 അധ്യയന വർഷത്തെ എസ്.എസ്.എൽ.സി (SSLC) പരീക്ഷയിൽ മുഴുവൻ വിഷയങ്ങളിലും ഫുൾ എ പ്ലസ് (Full A+) നേടിയ വിദ്യാർത്ഥികൾ എന്നിവരെ ചടങ്ങിൽ അനുമോദിച്ചു.
ചടങ്ങിൽ പഞ്ചായത്ത് വൈസ് പ്രസിഡന്റ് ജാസ്മിൻ കബീർ, വികസന സ്റ്റാൻഡിങ് കമ്മിറ്റി ചെയർമാൻ ഷുക്കൂർ ചെർക്കള, പഞ്ചായത്ത് അംഗങ്ങളായ അബൂബക്കർ കരുമാനം, മഹ്മൂദ്, ഹനീഫ, കുടുംബശ്രീ ജില്ലാ മിഷൻ ബ്ലോക്ക് കോർഡിനേറ്റർ റെനീഷ എന്നിവർ ആശംസകൾ നേർന്നു സംസാരിച്ചു.
കുട്ടികൾക്കായുള്ള വിവിധ പരിശീലന പരിപാടികൾക്കും ക്ലാസുകൾക്കും ബാലകൃഷ്ണൻ മാഷ്, ശരീഫ് മാഷ്, സുരേഷ് മാഷ് എന്നിവർ നേതൃത്വം നൽകി. സി.ഡി.എസ് ഭരണസമിതി അംഗങ്ങൾ, സപ്പോർട്ടിങ് അംഗങ്ങൾ, കുടുംബശ്രീ പ്രവർത്തകർ തുടങ്ങിയവർ പരിപാടിയിൽ സംബന്ധിച്ചു. സി.ഡി.എസ് വൈസ് ചെയർപേഴ്സൺ ചടങ്ങിൽ സ്വാഗതവും, സി.ഡി.എസ് എസ്.ഡി (SD) കൺവീനർ രജിത നന്ദിയും രേഖപ്പെടുത്തി.
Leave a Reply