ലോക കാർ റാലി ചാമ്പ്യൻഷിപ്പിൽ (WRC) അഭിമാനകരമായ നേട്ടവുമായി ഇന്ത്യൻ സഖ്യം. പാരഗ്വായിൽ നടന്ന ലോക കാർ റാലി ചാമ്പ്യൻഷിപ്പിന്റെ പതിനൊന്നാം റൗണ്ടായ ‘റാലി ഡെൽ പാരഗ്വായ്’ ഡബ്ല്യു.ആർ.സി 3 (WRC 3) വിഭാഗത്തിൽ നവീൻ പുലിഗില്ല – മൂസ ഷെരീഫ് ജോടി മൂന്നാം സ്ഥാനം സ്വന്തമാക്കി. ഇതോടെ തുടർച്ചയായ മൂന്നാം പോഡിയം ഫിനിഷാണ് ഈ ഇന്ത്യൻ സഖ്യം സ്വന്തമാക്കിയത്.
ഹൈദരാബാദ് സ്വദേശിയായ ഡ്രൈവർ നവീൻ പുലിഗില്ലയും കാസർകോട് മൊഗ്രാൽ സ്വദേശിയായ പ്രശസ്ത കോ-ഡ്രൈവർ മൂസ ഷെരീഫും അടങ്ങിയ സംഘം ‘ടീം ഡ്യൂറാൻ റേസിങ്ങി’ന്റെ ഫോർഡ് ഫിയസ്റ്റ റാലി 3 കാറിലാണ് മത്സരിച്ചത്. അതീവ ദുഷ്കരമായ റെഡ്-ഗ്രാവൽ ട്രാക്കിൽ നടന്ന പോരാട്ടത്തിൽ 22 പ്രത്യേക വേഗ ഘട്ടങ്ങളിലായി (Special Stages) 357.64 കിലോമീറ്റർ ദൂരം താണ്ടിയാണ് ഇരുവരും ഈ ചരിത്ര വിജയം കൈവരിച്ചത്.
നേട്ടങ്ങളുടെ തുടർച്ച:
- കഴിഞ്ഞ നവംബറിൽ നടന്ന ഡബ്ല്യു.ആർ.സി സൗദി റാലിയിൽ രണ്ടാം സ്ഥാനം നേടി.
- സഫാരി റാലി കെനിയയിൽ മൂന്നാം സ്ഥാനം കരസ്ഥമാക്കി.
- ഡബ്ല്യു.ആർ.സി വിഭാഗത്തിൽ പോഡിയം നേടുന്ന ആദ്യ ഇന്ത്യൻ ഡ്രൈവർ–കോ ഡ്രൈവർ കൂട്ടുകെട്ടെന്ന ഖ്യാതിയും നവീൻ പുലിഗില്ല–മൂസ ഷെരീഫ് സഖ്യം നേരത്തെ സ്വന്തമാക്കിയിരുന്നു.
‘ആശ്രു ഗ്രൂപ്പിന്റെ’ പിന്തുണയോടെ മത്സരിക്കുന്ന ഇന്ത്യൻ സഖ്യത്തിന്റെ അടുത്ത പോരാട്ടം ഉടൻതന്നെ ചിലിയിൽ നടക്കുന്ന റാലിയിലാണ്.
Leave a Reply