തിരുവനന്തപുരം: സംസ്ഥാനത്ത് വൈദ്യുതി നിരക്കിലും സർചാർജുകളിലും വർധനവിന് വഴിയൊരുക്കി പുതിയ താരിഫ് നയം സംസ്ഥാന വൈദ്യുതി റെഗുലേറ്ററി കമ്മീഷൻ വിജ്ഞാപനം ചെയ്തു. 2027 ഏപ്രിൽ 1 മുതൽ 2032 മാർച്ച് 31 വരെയുള്ള അഞ്ചുവർഷ കാലയളവിലേക്കാണ് പുതിയ നയം ബാധകമാകുന്നത്.
കെ.എസ്.ഇ.ബിയുടെ മുൻകാല നഷ്ടമായ 5,000 കോടി രൂപ സർചാർജിലൂടെ നാല് വർഷംകൊണ്ട് ഈടാക്കാനാണ് പുതിയ നയത്തിലൂടെ ലക്ഷ്യമിടുന്നത്. വ്യവസായ ഉപഭോക്താക്കൾക്ക് നിശ്ചിത നിരക്കിന്റെ അടിസ്ഥാനത്തിലും മറ്റ് വിഭാഗങ്ങൾക്ക് പ്രത്യേക ശതമാന കണക്കിലുമാകും സർചാർജ് ചുമത്തുക.
പീക്ക് സമയക്രമത്തിൽ മാറ്റം
വൈദ്യുതി ഉപഭോഗം ഏറ്റവും കൂടുതലുള്ള പീക്ക് സമയത്തിൽ പ്രധാന മാറ്റമാണ് വരുത്തിയിരിക്കുന്നത്.
- പീക്ക് സമയം: നിലവിൽ വൈകിട്ട് 6 മണി മുതൽ രാത്രി 10 മണി വരെയായിരുന്ന പീക്ക് സമയം ഇനി മുതൽ വൈകിട്ട് 6 മുതൽ രാത്രി 11:30 വരെയാകും. ഒന്നര മണിക്കൂറാണ് അധികമായി നീട്ടിയത്.
- ഓഫ് പീക്ക് സമയം: രാത്രി 11:30 മുതൽ രാവിലെ 8 മണി വരെയും രാവിലെ 8 മുതൽ വൈകിട്ട് 6 വരെയുമുള്ള സമയം കുറഞ്ഞ നിരക്കുള്ള ഓഫ് പീക്ക് സമയമായി നിശ്ചയിക്കാം.
പുതിയ സമയക്രമം അനുസരിച്ച് സ്മാർട്ട് മീറ്ററുകൾ, ടി.ഒ.ഡി (Time of Day) മീറ്ററുകൾ, എ.ബി.ഡി മീറ്ററുകൾ എന്നിവ ഘടിപ്പിച്ചിട്ടുള്ള ഉപഭോക്താക്കൾക്ക് പീക്ക് സമയത്ത് ഉയർന്ന നിരക്ക് ബാധകമാകും. അതേസമയം, പകൽ സമയങ്ങളിൽ കൂടുതൽ വൈദ്യുതി ഉപയോഗിക്കുന്നവർക്ക് നിരക്ക് കുറച്ചുനൽകാനുള്ള നിർദേശവും കമ്മീഷന്റെ ഉത്തരവിലുണ്ട്.
വീടുകളിൽ വൈദ്യുതി സംഭരണ സംവിധാനങ്ങൾ (Battery Storage) സ്ഥാപിച്ച് രാത്രിയിൽ ഗ്രിഡിലേക്ക് വൈദ്യുതി തിരികെ നൽകുന്നവർക്ക് പ്രോത്സാഹന വില നൽകണമെന്നും പുതിയ താരിഫ് നയം ശുപാർശ ചെയ്യുന്നുണ്ട്.
Leave a Reply