സഹോദരിക്ക് പിന്നാലെ സഹോദരനും; കാസർകോട് മുക്കൂട് സ്വദേശിയായ പ്രവാസി യുവാവിനെ മംഗളൂരുവിൽ ജീവനൊടുക്കിയ നിലയിൽ കണ്ടെത്തി

കാസർകോട്: നീറ്റ് പുനഃപരീക്ഷാ പരിശീലനത്തിനിടെ സഹോദരി ജീവനൊടുക്കിയതിന് പിന്നാലെ പ്രവാസി യുവാവിനെയും മംഗളൂരുവിലെ ലോഡ്ജിൽ തൂങ്ങിമരിച്ച നിലയിൽ കണ്ടെത്തി. കാസർകോട് ബേക്കൽ പള്ളിക്കര മുക്കൂടിലെ മഹേഷിന്റെ മകൻ അർജുൻ മഹേഷ് (24) ആണ് മരിച്ചത്. മംഗളൂരു ബജ്‌പെ പോലീസ് സ്റ്റേഷൻ പരിധിയിലെ മറവൂരിലുള്ള ലോഡ്ജ് മുറിയിലാണ് തിങ്കളാഴ്ച ഉച്ചയോടെ അർജുനെ മരിച്ച നിലയിൽ കണ്ടെത്തിയത്.

കഴിഞ്ഞ ജൂൺ ആദ്യവാരത്തിലാണ് അർജുന്റെ സഹോദരി ഐജ ആർ. മഹേഷ് പാലായിലെ ഹോസ്റ്റൽ മുറിയിൽ ജീവനൊടുക്കിയത്. ജൂൺ 21-ന് നടന്ന നീറ്റ് പുനഃപരീക്ഷയ്ക്കുള്ള തയ്യാറെടുപ്പുകൾക്കിടയിലായിരുന്നു സംഭവം. സഹോദരിയുടെ അപ്രതീക്ഷിത വേർപാടിൽ കടുത്ത മാനസിക സംഘർഷത്തിലായിരുന്നു അർജുൻ എന്ന് ബന്ധുക്കൾ പറയുന്നു.

സംഭവിച്ചത് ഇങ്ങനെ:

സഹോദരിയുടെ മരണസമയത്ത് നാട്ടിലായിരുന്ന അർജുൻ പിന്നീട് ജോലി സ്ഥലമായ ഗൾഫിലേക്ക് മടങ്ങിയിരുന്നു. ഞായറാഴ്ച നാട്ടിലേക്ക് തിരിക്കുന്നുവെന്ന് അടുത്ത സുഹൃത്തുക്കളെ അറിയിച്ച ശേഷമാണ് അർജുൻ മംഗളൂരുവിലേക്കുള്ള വിമാനത്തിൽ കയറിയത്.

ഞായറാഴ്ച ഉച്ചയ്ക്ക് 1.00: നാട്ടിലേക്ക് ഫോൺ വിളിച്ച് അമ്മയോട് സംസാരിച്ചെങ്കിലും താൻ ഗൾഫിൽ നിന്ന് പുറപ്പെട്ട കാര്യവും മംഗളൂരുവിൽ എത്തിയ വിവരവും അർജുൻ പറഞ്ഞിരുന്നില്ല.
ഞായറാഴ്ച ഉച്ചയ്ക്ക് ശേഷം: അർജുൻ നാട്ടിലേക്ക് പുറപ്പെട്ടിട്ടുണ്ടെന്ന വിവരം സുഹൃത്തുക്കൾ വീട്ടിൽ വിളിച്ച് അറിയിച്ചു.
ബന്ധുക്കളുടെ തിരച്ചിൽ: വിവരമറിഞ്ഞ വീട്ടുകാർ അർജുനെ ഫോണിൽ ബന്ധപ്പെടാൻ ശ്രമിച്ചെങ്കിലും മറുപടിയുണ്ടായില്ല. വൈകാതെ ഫോൺ സ്വിച്ച് ഓഫ് ആകുകയും ചെയ്തു. സംശയം തോന്നിയ ബന്ധുക്കളും നാട്ടുകാരും ഞായറാഴ്ച തന്നെ മംഗളൂരുവിലെത്തി വിവിധ ലോഡ്ജുകളിൽ തിരച്ചിൽ നടത്തിയെങ്കിലും അർജുനെ കണ്ടെത്താനായില്ല.

ലോഡ്ജിൽ നൽകിയത് തെറ്റായ പേര്

തിങ്കളാഴ്ച ഉച്ചയോടെയാണ് മറവൂരിലെ ലോഡ്ജിൽ അർജുനെ മരിച്ച നിലയിൽ കണ്ടെത്തിയത്. സ്വന്തം പേരിനൊപ്പം മാതാവിന്റെ പേര് കൂട്ടിച്ചേർത്ത് ‘അർജുൻ രാധിക’ എന്ന വിലാസത്തിലാണ് അർജുൻ ലോഡ്ജിൽ മുറിയെടുത്തിരുന്നത്.

സംഭവത്തിൽ ബജ്‌പെ പോലീസ് കേസെടുത്ത് അന്വേഷണം ആരംഭിച്ചു. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്‌മോർട്ടത്തിനായി വെൻലോക് ആശുപത്രി മോർച്ചറിയിലേക്ക് മാറ്റി.