കോട്ടയം: എൻഫോഴ്സ്മെന്റ് ഡയറക്ടറേറ്റിനെതിരെ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ. രാഷ്ട്രീയ പാർട്ടികളെ ലക്ഷ്യമിട്ട് ഇ.ഡി പ്രതികളാക്കുകയാണെന്നും സംസ്ഥാനത്തെ സഹകരണ മേഖലയെ സംരക്ഷിക്കാനല്ല, മറിച്ച് തകർക്കാനാണ് കേന്ദ്ര ഏജൻസിയുടെ ശ്രമമെന്നും അദ്ദേഹം ആരോപിച്ചു. കരുവന്നൂർ സഹകരണ ബാങ്ക് വിഷയം ഉയർത്തിക്കാട്ടിയായിരുന്നു അദ്ദേഹത്തിന്റെ പ്രതികരണം. കോട്ടയം ഇത്തിത്താനം ജനതാ സഹകരണ ബാങ്കിന്റെ ശതാബ്ദി ആഘോഷങ്ങളുടെ സമാപന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു പിണറായി വിജയൻ.
കരുവന്നൂർ ബാങ്കിൽ അഴിമതി നടത്തിയവരെ കൃത്യമായി കണ്ടെത്തുകയും അവർക്കെതിരെ നടപടി സ്വീകരിക്കുകയും ചെയ്തിരുന്നതാണെന്ന് പ്രതിപക്ഷ നേതാവ് ചൂണ്ടിക്കാട്ടി. അവർ കേസിൽപ്പെട്ടു. ആ ഘട്ടത്തിലാണ് ഇ.ഡി വരുന്നത്. കേസിൽ ഉൾപ്പെട്ട ചിലരെ ഇ.ഡി സ്വാധീനിക്കുകയും പിന്നീട് മാപ്പുസാക്ഷികളാക്കുകയുമാണ് ചെയ്തത്. അതിനുശേഷം ഇ.ഡിയോ അവരെ നയിക്കുന്നവരോ മനസ്സിൽ കാണുന്ന കാര്യങ്ങൾ മാപ്പുസാക്ഷികൾ പറയേണ്ട സ്ഥിതിയാണുള്ളതെന്നും അദ്ദേഹം കുറ്റപ്പെടുത്തി.
പ്രതികളെ മാപ്പുസാക്ഷികളാക്കി എഴുതിവാങ്ങുന്ന സ്റ്റേറ്റ്മെന്റുകൾ വലിയ തെളിവാണെന്ന് പറഞ്ഞ് സി.പി.ഐ.എമ്മിനെ ഇ.ഡി പ്രതിയാക്കുകയാണെന്ന് പിണറായി വിജയൻ പറഞ്ഞു. സി.പി.ഐ.എമ്മിന്റെ തൃശൂർ ജില്ലാ കമ്മിറ്റി സെക്രട്ടറിയായി ആരൊക്കെ വന്നോ അവരെയെല്ലാം കരുവന്നൂർ കേസിൽ പ്രതിചേർത്തു. കാര്യങ്ങൾ എങ്ങോട്ടാണ് പോകുന്നതെന്ന് ചോദിച്ച അദ്ദേഹം, അന്വേഷണ ഏജൻസിയുടെ യഥാർത്ഥ ഉദ്ദേശ്യം എന്താണെന്നും ചോദിച്ചു.
ഇ.ഡി രാഷ്ട്രീയമായി കാര്യങ്ങൾ കൈകാര്യം ചെയ്യാനാണ് നോക്കുന്നത്. സഹകരണ മേഖലയെ നന്നാക്കാനല്ല, തകർക്കാനാണ് നീക്കം. സഹകരണ മേഖലയിൽ അഴിമതി തൊട്ടുതീണ്ടാൻ പാടില്ലെന്നതായിരുന്നു സഹകരണ ബാങ്കുകളുടെ പ്രത്യേകതയെന്നും അതേ രീതിയിൽത്തന്നെ പ്രസ്ഥാനം നിലനിൽക്കണമെന്നും അദ്ദേഹം കൂട്ടിച്ചേർത്തു. സി.എം.ആർ.എൽ – എക്സാലോജിക് സാമ്പത്തിക ഇടപാട് കേസിൽ ഇ.ഡി നടത്തുന്ന നീക്കങ്ങളുടെ പശ്ചാത്തലത്തിൽ കൂടിയാണ് പ്രതിപക്ഷ നേതാവിന്റെ ഈ പ്രതികരണം.
Leave a Reply