കണ്ണൂർ: ക്വട്ടേഷൻ-സ്വർണ്ണക്കടത്ത് കേസുകളിലെ പ്രതി അർജുൻ ആയങ്കിക്കെതിരെ കാപ്പ (കേരള ആന്റി സോഷ്യൽ ആക്ടിവിറ്റീസ് പ്രിവൻഷൻ ആക്ട് – KAAPA) ചുമത്തി. കണ്ണൂർ സിറ്റി പൊലീസ് കമ്മീഷണർ സമർപ്പിച്ച ശുപാർശ ജില്ലാ കളക്ടർ അംഗീകരിച്ചതോടെയാണ് നടപടി.
നിലവിൽ ജുഡീഷ്യൽ കസ്റ്റഡിയിലുള്ള പ്രതിക്ക് ജാമ്യം ലഭിച്ചാൽ വീണ്ടും സാമൂഹികവിരുദ്ധ-ക്രിമിനൽ പ്രവർത്തനങ്ങളിൽ ഏർപ്പെടാൻ സാധ്യതയുണ്ടെന്ന റിപ്പോർട്ടിന്റെ അടിസ്ഥാനത്തിലാണ് ഉത്തരവ്. അർജുൻ ആയങ്കിയെ കണ്ണൂർ സെൻട്രൽ ജയിലിൽ കരുതൽ തടങ്കലിൽ പാർപ്പിക്കാൻ സിറ്റി പൊലീസ് കമ്മീഷണർക്ക് ജില്ലാ കളക്ടർ നിർദ്ദേശം നൽകി.
ഏഴ് വർഷത്തിനിടെ 9 ക്രിമിനൽ കേസുകൾ
കഴിഞ്ഞ ഏഴ് വർഷത്തിനിടെ ഒൻപതോളം ക്രിമിനൽ കേസുകളിൽ അർജുൻ ആയങ്കി പ്രതിയാണെന്ന് പൊലീസ് വ്യക്തമാക്കി.
- സ്വർണ്ണം പൊട്ടിക്കൽ (സ്വർണ്ണക്കവർച്ച), സ്വർണ്ണക്കടത്ത് കേസുകൾ
- ആഭ്യന്തര മന്ത്രിയെയും ഉന്നത പൊലീസ് ഉദ്യോഗസ്ഥരെയും സമൂഹമാധ്യമങ്ങളിലൂടെ ഭീഷണിപ്പെടുത്തിയ കേസുകൾ
- കോതമംഗലം, ഊന്നുകൽ സിഐമാരെ ഭീഷണിപ്പെടുത്തിയ കേസുകൾ
തുടങ്ങിയ ഗുരുതരമായ കുറ്റകൃത്യങ്ങളാണ് ഇയാൾക്കെതിരെ നിലവിലുള്ളത്.
നാടകീയ നീക്കങ്ങൾക്കൊടുവിൽ അറസ്റ്റ്
കണ്ണൂർ സൈബർ പൊലീസ് രജിസ്റ്റർ ചെയ്ത കേസിലാണ് അർജുനെ കണ്ണൂർ താളിക്കാവിലെ അഭിഭാഷക ദമ്പതികളുടെ വീട്ടിൽ നിന്ന് പൊലീസ് കസ്റ്റഡിയിലെടുത്തത്. കൂത്തുപറമ്പ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാൻഡ് ചെയ്ത് തലശ്ശേരി സബ് ജയിലിലേക്ക് മാറ്റിയിരുന്നു.
തുടർന്ന്, കോതമംഗലം സിഐയെ ഭീഷണിപ്പെടുത്തിയ കേസിൽ പ്രത്യേക അന്വേഷണസംഘം തലശ്ശേരി സബ് ജയിലിലെത്തി വീണ്ടും അറസ്റ്റ് രേഖപ്പെടുത്തുകയായിരുന്നു. നിലവിൽ തെളിവെടുപ്പിനായി പൊലീസ് കസ്റ്റഡിയിൽ തുടരുന്നതിനിടയിലാണ് കാപ്പ ചുമത്താനുള്ള ഉത്തരവ് വരുന്നത്.
Leave a Reply