കൊല്ലം: കരുനാഗപ്പള്ളിയിലെ ബെവ്കോ ഔട്ട്ലെറ്റില് മദ്യത്തിന് നിശ്ചയിച്ചതിലും കൂടുതല് പണം വാങ്ങിയെന്ന പരാതിയില് രണ്ട് ജീവനക്കാരെ സസ്പെന്ഡ് ചെയ്തു. ജീവനക്കാരനായ അമല്ദേവ്, ഷോപ്പ് ഇന് ചാര്ജ് സുധിന് രാജ് എന്നിവര്ക്കെതിരെയാണ് ബെവ്കോ എം.ഡി അച്ചടക്ക നടപടി സ്വീകരിച്ചത്. എക്സൈസ് മന്ത്രിയുടെ കര്ശന നിര്ദേശത്തെ തുടര്ന്നാണ് നടപടി.
ഓഡിറ്റ് സംഘത്തിന്റെ പരിശോധനയില് ക്രമക്കേട് സ്ഥിരീകരിച്ചു
കരുനാഗപ്പള്ളി ഔട്ട്ലെറ്റിലെ കൗണ്ടറില് വെച്ച് അമല്ദേവ് ഉപഭോക്താവില് നിന്നും കുപ്പി ഒന്നിന് 50 രൂപ അധികമായി വാങ്ങിയെന്നാണ് പ്രാഥമിക അന്വേഷണത്തില് വ്യക്തമായത്. ഇതുസംബന്ധിച്ച് ഉപഭോക്താക്കള് പരാതി ഉന്നയിച്ചിട്ടും അന്വേഷണം നടത്താനോ നടപടിയെടുക്കാനോ തയ്യാറാകാതിരുന്നതിനാണ് ഷോപ്പ് ഇന് ചാര്ജായ സുധിന് രാജിനെതിരെ നടപടിയെടുത്തത്.
പരാതി ഉയര്ന്നതിന് പിന്നാലെ കൊല്ലം ജില്ലാ ഓഡിറ്റ് ടീം കരുനാഗപ്പള്ളി ഔട്ട്ലെറ്റില് നേരിട്ടെത്തി വിശദമായ പരിശോധന നടത്തിയിരുന്നു. ഓഡിറ്റ് വിഭാഗം സമര്പ്പിച്ച അന്വേഷണ റിപ്പോര്ട്ടിന്റെ അടിസ്ഥാനത്തിലാണ് ഇരുവരെയും സര്വീസില് നിന്ന് സസ്പെന്ഡ് ചെയ്യാന് ബെവ്കോ എം.ഡി ഉത്തരവിട്ടത്.
അഴിമതി കണ്ടാല് മന്ത്രിയെ നേരിട്ട് അറിയിക്കാം
മദ്യം പൂഴ്ത്തിവെച്ച് കൃത്രിമ ക്ഷാമമുണ്ടാക്കി കൂടിയ വിലയ്ക്ക് വില്ക്കാമെന്ന് ആരും കരുതേണ്ടെന്ന് എക്സൈസ് മന്ത്രി വ്യക്തമാക്കി. ബെവ്കോ ഔട്ട്ലെറ്റുകളില് ഇത്തരത്തിലുള്ള ക്രമക്കേടുകളോ അഴിമതിയോ ശ്രദ്ധയില്പ്പെട്ടാല് പൊതുജനങ്ങള്ക്ക് മന്ത്രിയുടെ ഓഫീസുമായി നേരിട്ട് ബന്ധപ്പെടാമെന്നും ഉപഭോക്താക്കളെ ചൂഷണം ചെയ്യുന്ന ജീവനക്കാര്ക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്നും അധികൃതര് മുന്നറിയിപ്പ് നല്കി.
Leave a Reply