കൊച്ചി: പ്രമുഖ യൂട്യൂബർ അജു അലക്സിന് (ചെകുത്താൻ) നേരെ അജ്ഞാത സംഘത്തിന്റെ ആക്രമണം. നടൻ മോഹൻലാലിനെയും അദ്ദേഹത്തിന്റെ ആരാധകരെയും സോഷ്യൽ മീഡിയയിലൂടെ അധിക്ഷേപിച്ചുവെന്ന് ആരോപിച്ചാണ് മർദ്ദനമെന്നാണ് പരാതി. വ്യാഴാഴ്ച രാത്രി കൊച്ചി ഇടപ്പള്ളിയിൽ വെച്ചാണ് സംഭവം നടന്നത്. സംഭവത്തിൽ കളമശ്ശേരി പോലീസ് കേസെടുത്ത് അന്വേഷണം ആരംഭിച്ചു.
ആക്രമണത്തിൽ പരിക്കേറ്റ് ആശുപത്രിയിൽ ചികിത്സ തേടിയെത്തിയപ്പോഴും പ്രതികൾ പിന്തുടർന്നെത്തി മർദ്ദിച്ചുവെന്ന് അജു അലക്സ് പോലീസിന് നൽകിയ പരാതിയിൽ പറയുന്നു. കണ്ടാലറിയാവുന്ന അഞ്ചുപേർക്കെതിരെയാണ് പോലീസ് നിലവിൽ കേസെടുത്തിരിക്കുന്നത്.
വിവാദവും മുൻ കേസുകളും
വയനാട് ഉരുൾപൊട്ടൽ ദുരന്തബാധിത പ്രദേശം സന്ദർശിക്കാൻ നടൻ മോഹൻലാൽ സൈനിക വേഷത്തിൽ എത്തിയതിനെ അജു അലക്സ് യൂട്യൂബ് ചാനലിലൂടെ രൂക്ഷമായ ഭാഷയിൽ വിമർശിച്ചിരുന്നു. ഇതേത്തുടർന്ന് മോഹൻലാലിനെതിരെ അപകീർത്തികരമായ പരാമർശം നടത്തിയതിന് താരസംഘടനയായ ‘അമ്മ’യുടെ അന്നത്തെ ജനറൽ സെക്രട്ടറി സിദ്ദിഖ് നൽകിയ പരാതിയിൽ അജു അലക്സിനെതിരെ നേരത്തെ പോലീസ് കേസെടുത്തിരുന്നു.
ഭാരതീയ ന്യായ സംഹിതയിലെ (BNS) 192, 296 (ബി), കേരള പോലീസ് ആക്ട് 2011-ലെ 120 (ഒ) തുടങ്ങിയ വകുപ്പുകൾ ചുമത്തിയാണ് അജുവിനെതിരെ അന്ന് കേസെടുത്തത്. ഇതിന് പിന്നാലെയാണ് ഇപ്പോൾ താരം മർദ്ദനത്തിനിരയായിരിക്കുന്നത്. കഴിഞ്ഞ നിയമസഭാ തെരഞ്ഞെടുപ്പിൽ തിരുവല്ല മണ്ഡലത്തിൽ നിന്നും സ്വതന്ത്ര സ്ഥാനാർത്ഥിയായി അജു അലക്സ് മത്സരിച്ചിരുന്നു. സംഭവത്തിൽ പ്രതികൾക്കായുള്ള തിരച്ചിൽ പോലീസ് ശക്തമാക്കിയിട്ടുണ്ട്.
Leave a Reply